Eyjamaðurinn Tómas Bent Magnússon spilaði allan leikinn í 1-0 sigri Hearts á Aberdeen í Skosku úrvalsdeildinni í fótbolta fyrr í dag. 

Tómas lék á miðsvæðinu hjá Hearts þegar liðið fékk Aberdeen í heimsókn til Edinborgar. Heimamenn voru sterkari aðilinn í leiknum og komust í 1-0 eftir tæplega hálftíma leik. Claudio Braga skoraði mark Hearts. Ekki voru fleiri mörk skoruð og mikilvægur sigur Hearts staðreynd. 

Hearts er á toppi skosku deildarinnar með 63 stig, sjö stigum á undan Rangers, sem eiga þó leik til góða. Aberdeen er í áttunda sæti með 29 stig. 

Hearts leikur næst gegn Kilmarnock á útivelli, laugardaginn 14. mars.