- Eyjafréttir
- ·
- Aðsend grein, Stjórnmál
- ·
Aðsend grein
Linda Rós Sigurðardóttir
Vestmannaeyjar, eyjan okkar er ein fallegasta náttúruperla Íslands og við ættum að fara vel með hana og vernda hana eins og við getum. Auðvitað getur verið erfitt, tímafrekt og sundum meiri kostnaður að byggja með henni en yfir hana en verður það ekki þess virði að lokum. Viljum við ekki halda í fallegu klettana okkar eða hraunið okkar þar sem það er hægt? Myndum við ekki sjá eftir því að moka þessu öllu í burtu ef þess þarf ekki? Tökum sem dæmi klettara fyrir framan íþróttamiðstöðina, hefði ekki verið nær að grafa upp svæðið fyrir aftan húsið, þar er feikilega stórt svæði sem er ekkert notað og erfitt að finna mikla fegurð í þvi.
Það kom upp hugmynd að byggja gámabryggju í innsiglinguna okkar, sem betur fer kom Vegagerðin með þá marg notuðu skýringu að ölduhæðin væri of mikil og frátafir yrðu of miklar (getum þó þakkað þeim fyrir það). Ég spyr er fólk almennt með lokuð augum þegar það siglir þarna inn? Hugmyndin að eyðileggja þetta svæði með risa stórum krana og ryðguðum gámum er jafn fáránlega og láta gefa sér listaverk og borga fyrir gjöfina 50 milljónir.
Viljum við ekki stolt sýna ferðamönnum sem heimsækja okkur fallegu eyjuna okkar? Við í Miðflokknum viljum vernda náttúruna þar sem það er hægt t.d.með því að gera hluta af nýja hrauninu að jarðvangi. Þá spyrja sjálfsagt einhverjir hvað er jarðvangur?
Jarðvangar UNESCO Global Geoparks eru sérstök svæði sem geyma merkilegar jarðminjar sem hafa alþjóðlegt gildi og segja sögu um myndun lands, áhrif jarðfræði á lífríki, menningu og þróun svæða. í jarðvangi er lögð áhersla á að vernda náttúruna, jarðminjar eru nýttar í samspili við aðrar náttúru- og menningarminjar til að auka skilning á helstu áskorunum samtímans. Þar á meðal eru sjálfbær nýting auðlinda t.d. í ferðamennsku, minnkun losunar gróðurhúsalofttegunda og leiðir til að draga úr áhrifum náttúruhamfara.
Með því að draga fram mikilvægar jarðminjar í sögulegu og samfélagslegu samhengi stuðla hnattrænir jarðvangar að auknu stolti og sterkari tengingu íbúa við heimabyggð sína. Jarðferðamennska (e. geotourism), skapar jafnframt tækifæri til nýsköpunar í atvinnulífi, með nýjum störfum, aukinni þjálfun og fjölbreyttari tekjulindum, á sama tíma og náttúruverðmæti svæðisins eru vernduð.
Í stuttu máli: Jarðvangar eru svæði þar sem náttúra, fræðsla og ferðamennska fara saman á sjálfbæran hátt.
Við þurfum að hugsa til framtíðar áður en við mokum náttúruauðlindinni okkar í burtu því við tökum ekki mistökin aftur.
Við í Miðflokkum viljum stuðla að skynsemi og framtíðansýn á öllum sviðum.
Linda Rós Sigurðardóttir
Höfundur skipar 7. sæti á lista Miðflokksins í Vestmannaeyjum.
