Þriðji þáttur sýningarraðarinnar “Vestmannaeyjar í gegnum linsu liðins tíma” verður sýndur laugardaginn 14. febrúar kl. 11.00–12.00 í Sagnheimum. Á undan verður sýnt stutt myndabrot, líkt og í fyrri tvö skiptin.

Þátturinn er afar fjölbreyttur og borið verður víða niður. Elsta efnið er frá árinu 1924 og í svarthvítu en meginefnið eru litmyndir frá árunum 1950–1970, segir í tilkynningu frá skipuleggjendum.

Meðal efnis má nefna úteyjarlíf, veiði í Súlnaskeri og „blússið gefið“ árið 1924, Sjómannadag á Stakkó 1953, sundlaugina við Miðhúsatún, grindhvalavaðu í höfninni 1958, sjóstangveiði um 1960, fótboltaleik á vellinum við Hástein, Surtseyjargosið, Stýrimannaskólann á Breiðabliki um 1970 og margt fleira áhugavert. Sýningin í heild sinni tekur um 60 mínútur.

Líkt og á fyrri sýningum mun Arnar Sigurmundsson greina nánar frá myndefninu og leiða umræður. Gunnar Júlíusson, grafískur hönnuður, yfirfór myndefnið og sá um úrvinnslu verkefnisins, sem hlaut styrk úr Uppbyggingarsjóði Suðurlands.