Nú er komin út skýrsla um orkukostnað heimila m.v. gjaldskrár 1. september 2020. Auk staðanna sem miðað var við síðustu ár hafa 22 nýir staðir bæst við og ná tölur fyrir þá alla aftur til 2014. Samhliða skýrslunni kemur jafnframt út mælaborð þar sem hægt er að skoða orkukostnað í þéttbýli á korti og súluritum.

Raforka
Lægsta mögulega verð fyrir viðmiðunareignina, með flutnings- og dreifingarkostnaði, fæst hjá Veitum: Í Mosfellsbæ, í Reykjavík, Kópavogi, austurhluta Garðabæjar, á Seltjarnarnesi og á Akranesi, um 79 þ.kr. Hæsta gjald í þéttbýli er um 92 þ.kr. hjá Orkubúi Vestfjarða en raforkuverð eru áberandi hærri í dreifbýli, eða um 121 þ.kr. Lægsta mögulega verð í dreifbýli 53% hærra en lægsta mögulega verð í þéttbýli.

Húshitun
Þegar kemur að húshitunarkostnaði viðmiðunareignar er munurinn á milli svæða mun meiri en á raforkuverði. Lægsta mögulega verð er hæst 191 þ.kr. á stöðum þar sem þarf að notast við beina rafhitun, meðal annars á Grundarfirði, á Hólmavík, á Neskaupstað, á Reyðarfirði, í Vík og á Vopnafirði auk dreifbýlis á svæðum RARIK og Orkubús Vestfjarða. Með varmadælu er þó áætlað að hann geti lækkað í um 96 þ.kr. fyrir viðmiðunareign, eða um 50%. Lægsti húshitunarkostnaðurinn er á Flúðum og Seltjarnarnesi um 66 þ.kr. og í Brautarholti á Skeiðum um 53 þ.kr. og á þessum stöðum er því húshitunarkostnaður um þriðjungur af kostnaðinum þar sem hann er hæstur.

Vestmannaeyjar
Þegar staðan í Vestmannaeyjum er skoðuð þá er verðið á raforku fyrir áður nefnda viðmiðunareign 81.277 krónur sem er meðal þess lægst sem býðst á landinu. Þegar hitaveitan er aftur á móti skoðuð er kostnaður á ársgrundvelli 148.532 krónur sem skipar Vestmannaeyjum í hóp dýrari sveitarfélaga þegar kemur að húshitun. Þó ber að skoða þessar tölur með það til hliðsjónar að í Vestmannaeyjum er notast við húshitun með kyntri hitaveitu sem er fremur dýr og hitaveita með þeim hætti hvergi ódýrari en í Vestmannaeyjum.  

Heildarorkukostnaður
Ef horft er til lægsta mögulega heildarorkukostnaðar fyrir viðmiðunareignina þá er hann, líkt og undanfarin ár, hæstur í dreifbýli þar sem ekki er hitaveita 312 þ.kr. Heildarkostnaður í þéttbýli er hæstur 284 þ.kr. á Hólmavík og öðrum þéttbýlisstöðum á Vestfjörðum með beina rafhitun og þar næst 279 þ.kr. á þéttbýlisstöðum annars staðar á landinu þar sem er rafhitun, þ.m.t. í Grundarfirði, á Neskaupstað, á Reyðarfirði og á Vopnafirði. Lægsti heildarorkukostnaður landsins er á Seltjarnarnesi 145 þ.kr. en þar næst á Flúðum 155 þ.kr. og í Mosfellsbæ 160 þ.kr.

Nánari upplýsingar má sjá í meðfylgjandi skýrslu.