Bæjarstjórn Vestmannaeyja samþykkti á síðasta fundi sínum sameiginlega bókun þar sem lögð er áhersla á að hafinn verði undirbúningur að smíði nýrrar Vestmannaeyjaferju. Segir í bókuninni að reynslan undanfarinna vikna hafi sýnt með skýrum hætti hversu mikilvægt sé að tryggja öryggi og stöðugleika í samgöngum við Eyjar.

Málið var tekið fyrir í kjölfar yfirferðar Írisar Róbertsdóttur bæjarstjóra á stöðu samgangna síðustu vikur. Hún fór meðal annars yfir stöðuna á Herjólfi III, framvindu viðgerða á Herjólfi IV og helstu atriði sem komu fram á fundi með fulltrúum Vegagerðarinnar og nýjum dýpkunarverktaka Landeyjahafnar, Jan de Nul.

Í sameiginlegri bókun bæjarstjórnar segir að þær aðstæður sem skapast hafi í ferjusamgöngum eftir bilun um borð í Herjólfi IV sýni ótvírætt mikilvægi þess að hefja undirbúning að smíði nýrrar ferju.

Jafnframt segir að nauðsynlegt sé að hægt verði að halda uppi eðlilegum samgöngum við Vestmannaeyjar sem anna þörfum samfélagsins, án þess að það komi niður á samgöngum annarra landshluta.