Mennta- og barnamálaráðuneytið hefur birt drög að frumvarpi sem myndi takmarka aðgang barna að samfélagsmiðlum. Samkvæmt tillögunni fengi barn rétt til sjálfstæðs aðgangs á árinu sem það verður 15 ára. Drögin eru nú til umsagnar og hafa ekki orðið að lögum.

Markmið tillögunnar er að vernda börn í stafrænu umhverfi og draga úr mögulegum skaðlegum áhrifum samfélagsmiðla á líðan, þroska og öryggi þeirra, að því er fram kemur í tilkynningu ráðuneytisins.

Athygli vekur að frumvarpsdrögin leggja skyldur á foreldra og forsjáraðila vegna aðgangs barna að samfélagsmiðlum, en ekki á fyrirtækin sem reka miðlana. Verði frumvarpið að lögum yrði það því á ábyrgð foreldra og forsjáraðila að fylgja aldursmörkunum eftir.

Tillagan hefur verið birt í Samráðsgátt stjórnvalda, þar sem hægt er að senda inn umsögn. Hún er enn á frumstigi og á eftir að fara í gegnum frekari meðferð áður en ljóst verður hvort eða í hvaða mynd aldursmörkin taka gildi.