Eyjamaðurinn Sigurjón á Ítalíu- Vill efla samskipti þjóðanna – Sameina matarmenningu beggja þjóða – Íslandsleiðangur í haust

Eyjamaðurinn Sigurjón Aðalsteinsson sem dvelur langdvölum á Ítalíu er með margt á prjónunum þessa dagana. Hefur aflað sér mikilvægra viðskiptasambanda, á Íslandi og ekki síður á Ítalíu. Sér hann mikla möguleika á að koma ítölskum mat í hæsta gæðaflokki á framfæri á Íslandi og öfugt. Vinna að matvælaþróun og efna til annarrar Íslandskynningar á Ítalíu. Gæluverkefnið er að koma á vinabæjasambandi  Vestmannaeyja og Pompei, bæja sem urðu eldgosum að bráð, Pompei 79 og Vestmannaeyjar 1973.

Sigurjón hafði sett sig í samband við Svandísi Svarsdóttur, fyrrum matvælaráðherra og Bjarkeyju Olsen sem nú situr í þeim stól.  „Svandís samþykkti að hitta mig og ætlaði ég að kynna fyrir henni samvinnu mína við ítalskan kjötiðnaðarmann um að búa til ítalskt-íslenskt hrálamb sem heppnaðist frábærlega.  Hún samþykkti að hitta okkur en í millitíðinni veiktist ég hressilega og lá á sjúkrahúsi og var síðan í endurhæfingu fram í maí í vor.  Í dag er ég kátur sem bátur og vil fara að taka upp þráðinn á ný,“ segir Sigurjón.

Sigurjón starfar m.a. með Andrea Falaschi, kjötiðnaðarmanni sem hann segir þekktan á Ítalíu fyrir frábærar vörur. „Hann vinnur mikið með öðrum kjötiðnaðarmanni, sem er reyndar sá þekktasti í heimi, Dario Cecchini.  Í desember í fyrra settum við upp óperutónleika, þá fyrstu á Ítalíu það að við best vitum í búðinni hjá honum hérna í San Miniato, þar sem frændi minn Alexander Jarl og Monica Iusco sungu við frábærar undirtektir.

Allur þessi hópur ásamt tveimur vínsérfræðingum mæta til Eyja og verður slegið upp sannkallaðri ítalsk-íslenskri hátíð sem mun engan svíkja á Einsa Kalda 27. og 28. September nk. Sigurjón er að safna styrktaraðilum til að halda tónleika, með Alexander og Monicu til styrktar Krabbavörn en málefnið er honum mjög kært þar sem pabbi hans dó úr krabba og bróðir hans Elliði að glíma við það sama.

Það sem stendur til að gera í Íslandsleiðangrinum annað en að koma út í Eyjar er að fara í réttir, fylgjast með sláturgerð, hitta tvo ráðherra, heimsækja Alþingi o.fl. Þeir eru sem sagt að koma til að mæra íslenska lambið og íslenskan landbúnað, eitthvað sem Sigurjón segir að vonandi eigi eftir að skila sér í aukinni ásókn í þær vörur á Ítalíu og víðar. Það verður allt skrásett og myndað í bak og fyrir og því síðan gerð góð skil á Ítalíu í hinum ýmsu blöðum og tímaritum.

Unnið með snillingum

„Ég mun vinna með Einari Birni (Einsa Kalda) og Leif Kolbeins á La Primavera í framtíðinni, en uppi eru plön um að fara í samstarf við fyrirtæki bæði á Íslandi og Ítalíu um að fara í vöruþróun á hinum ýmsu vörum, spennandi ekki satt? Einnig ætlum við að fara í samstarf við tvo af frægustu kokkum Ítalíu, þá Andrea Mainardi og Enrico Derflingher. Þeir eru súperstjörnur hér á Ítalíu þar sem allt snýst um mat og fótbolta. Auk þess verður náttúrulega unnið með kjötiðnaðarmönnum Andrea Falaschi og Dario Checcini.“

Þá er ekki síður áhugaverð hugmynd Sigurjóns sem hann er að vinna að, að koma á vinabæjasambandi milli Vestmannaeyja og Pompei. „Ég hef sent erindi á Írisi Róberts bæjarstjóra og Palla Magg forseta bæjarstjórnar og Ferðamálasamtökin í Eyjum.  Ferðamálasamtökin eru áhugasöm um að fara í þetta verkefni en það sama verður ekki sagt um bæinn. Skrýtið því það gæti án vafa skilað miklu til Vestmannaeyja án mikils tilkostnaðar. Ég skrifaði líka samhljóða erindi til Lilju Daggar Alfreðsdóttur, menningarmálaráðherra. Vona að hún taki því vel.“

Starf Sigurjóns á Ítalíu nær allt aftur til ársins 2014. „Ég hef verið í miklum samskiptum og viðskiptum við þekkt trufflufyrirtæki hér í San Miniato og Michele Mancini sem er Michelin stjörnu kokkur. Í dag vinnur hann á hótelinu Stella Della Versilia hjá vini sínum Buffon, fyrrverandi landsliðsmarkverði Ítala.

„Með Savitar hef ég brallað ýmislegt, m.a. í samvinnu við Íslenska sjávarklasann þar sem við framleiddum niðursoðinn lax með trufflum sem fór í sölu í stórmarkaðina og út á Keflavíkurvöll. Vegna ýmissa vandamála urðum við því miður að leggja það verkefni til hliðar í bili.  Einnig hef ég unnið með Leif Kolbeins á La Primavera og hefur hann komið hingað til San Miniato og verið heiðurskokkur á stórri hvíttrufflu hátíð sem fer fram ár hvert.“

Á Íslandi hefur Sigurjón unnið með ekki síðri snillingum eins og Einsa Kalda sem er fremstur meðal jafningja. „Hann er eins ítalskur og nokkur Íslendingur getur orðið og hefur verið frábært að vinna með honum og hans fólki. Sönn fyrirmynd í því sem ég er að gera. Íslandstengingin, þar sem maður þekkir mann og annan hefur reynst mér vel á Ítalíu í að afla viðskiptatengsla sem geta skilað miklu.“

Tekur á móti gestum

Þá má að lokum geta þess að Sigurjón tekur að sér leiðsögn fyrir smærri hópa þar sem hann leiðir þá um óhefðbundnar slóðir sem mjög fáir ferðamenn fá að upplifa. „Ég bý í Perugía sem er höfuðborg Úmbría héraðs. Þess má geta að ferðavefurinn Lonley Planet, hefur valið Úmbía héraðið besta sælkeraáfangastað í heimi og er nú úr mörgu að velja, t.d. Eyjar.“

Í síðustu facebook færslu Sigurjóns má fá innsýn í hvað hann gerir með viðskiptavinum sínum í Umbría, einnig hefur hann farið með marga vini og kunningja í Toskanahéraðið, en þar hefur hann haldið mikið til og á meðal annars „mömmu“ í Flórens. Ef áhugi er á þá er öllum velkomið að hringja í hann eða senda honum skilaboð á Facebook.