Mikið líf hefur færst í húsnæðið að Skólavegi 1 en íslenska útivistarfatamerkið ZO-ON opnar pop-up verslun þar til húsa í hádeginu á morgun. Verslunin verður opin út sunnudaginn 6. ágúst og boðið verður upp á allt að 70% afslátt.

„Við höfum verið að prófa okkur svona áfram á hinum ýmsu stöðum á landinu, til dæmis verið á Akureyri og meira að segja úti í Færeyjum líka” segir Halldór Örn Jónsson, framkvæmdastjóri ZO-ON, í samtali við Eyjafréttir.

Bjóða upp á frían bjór

„Mikið af þessu eru nýjar vörur sem við setjum á niðursett verð, og síðan erum við með húfur og vettlinga og töskur og allt fyrir Þjóðhátíðina. Regnfatnaður, hlýr fatnaður og allt þar á milli,” segir Halldór og bætir við að hægt sé að næla sér í frían bjór í versluninni á föstudeginum á Þjóðhátíð.

Halldór hvetur Eyjamenn og aðra hátíðargesti yfir Þjóðhátíð að klæða sig vel enda oft kalt í Dalnum þegar líður á kvöldið.