Eins og áður hefur komið fram verða 100 ár liðin frá stofnun Taflfélags Vestmannaeyja laugardaginn 29. ágúst.

Af því tilefni er gefið út sérstakt átta síðna afmælisblað í stóru broti sem fór í aldreifingu í Vestmannaeyjum í dag.

Afmælisnefnd Taflfélagsins og ritnefnd blaðsins skipa Arnar Sigurmundsson, ábyrgðarmaður, Karl Gauti Hjaltason og Hallgrímur Steinsson, formaður Taflfélags Vestmannaeyja. Eyjasýn ehf. gefur blaðið út fyrir hönd félagsins og Eyjadreifing annast dreifingu þess.

Afmælisblaðið verður jafnframt aðgengilegt öllum í opinni vefútgáfu á Eyjafréttum til loka september.

Tvö afmælismót um helgina

Um helgina verða haldin tvö mót í tilefni 100 ára afmælis Taflfélags Vestmannaeyja. Mótin fara fram á opna svæðinu í Þekkingarsetrinu að Ægisgötu 2, 2. hæð.

Atskákmót verður haldið laugardaginn 29. ágúst kl. 12.00–18.00. Tímamörk eru 15 mínútur að viðbættum fimm sekúndum fyrir hvern leik.

Hraðskákmót verður haldið sunnudaginn 30. ágúst kl. 13.00–16.00. Tímamörk eru fimm mínútur að viðbættum fimm sekúndum fyrir hvern leik.

Tímamörkin eru heldur rýmri en almennt gerist í atskák og hraðskák á skákmótum.

Keppendur koma bæði úr Vestmannaeyjum og víðs vegar að af landinu. Öllum er heimil þátttaka og ekkert þátttökugjald er innheimt. Áhorfendum er einnig velkomið að fylgjast með mótunum á keppnisstað báða dagana.

Skráning fer fram á skak.is eða í síma 822-0351, segir í tilkynningu frá Taflfélagi Vestmannaeyja.

Hér má lesa blaðið.