Nú er komin fram í dagsljósið skýrsla Vegagerðarinnar um umferðaspá milli lands og Eyja næstu tvo áratugina. Hún er vægast sagt frábær fyrir okkur sem byggjum þennan bæ. Stöðug aukning svo langt sem spáin nær, eða kannski réttara sagt – stöðugt meiri eftirspurn eftir að komast til Eyja.

Samkvæmt líklegustu spá skýrslunnar má reikna með strax árið 2016 verði farþegar 440.000 og árið 2022, 540.000 og enn er spáð aukningu því lokaár spárinnar (2032) er reiknað með að flutningsþörfin sé komin uppí 740.000 farþega.

Hvíslað er um að gott hefði verið að stýrihópurinn sem blés til Borgarafundar í Eyjum s.l föstudag hefði tekið þessa skýrslu með og farið yfir hana samhliða áformum um byggingu minna skips.

Krafa Eyjamanna hlýtur að vera sú, að úr því að búið er að byggja of litla höfn og til stendur að smíða of lítið skip sem passar í höfnina að fengið verði annað skip sem mun sigla á móti núverandi Herjólfi og síðan á móti nýrri ferju.

Gæti Baldur verið fýsilegur kostur í það – sleppa því að selja núverandi Herjólf og láta hann sigla á móti nýju skipi, eða bara smíða tvö skip?