Það styrkir samfélagið okkar og eykur tiltrú allra á að Vestmannaeyjar geti haldið áfram að vaxa og dafna, þegar bæði fyrirtæki og einstaklingar eru tilbúnir að fjáfesta og framkvæma jafn mikið og raun ber vitni. Við erum svo heppin að búa í samfélagi sem er fullt af tækifærum og óendanlegri fegurð og auðlindum allt í kring.
Sterk staða bæjarsjóðs undanfarin ár
Ofaná þetta hefur sterk staða bæjarsjóðs undanfarin ár gefið tilefni til mikilla framkvæmda, þar sem lögð hefur verið áhersla á að búa til hagkvæmari og skilvirkari þjónustu fyrir bæjarbúa. Það hefur verið innspýting inn í samfélagið og hjálpað til að búa til góðan jarðveg til að byggja á. Í dag búum við enn við þann munað að geta haldið uppi framkvæmdarstiginu og eru margar framkvæmdir á lokametrunum sem fóru af stað fyrir nokkrum árum, einhverjar nýjar að hefjast og aðrar í pípunum.
Ber þar helst að nefna:
- Fiskiðjan, Ísfélagsreiturinn og Vigtartorgið. Ég held að það geti flestir verið sammála því að vel hefur tekist til á þessum reit sem er í raun andlit bæjarins og eitt það fyrsta sem fólk sér við komu til Eyja. Þessum framkvæmdum fer nú senn að ljúka og verður gaman að sjá heildarútkomuna.
- Ný slökkvistöð er nú að rísa og náðist að lokum sátt um staðsetningu eftir smá karp. Niðurstaðan er vonandi flestum að skapi og fáum við mun hentugri húsnæði með góðri tengingu við Áhaldahúsið.
- Ný sorporkustöð er því miður komin alltof stutt á veg, þrátt fyrir að loksins hafi sést til sólar frá yfirvöldum varðandi hinar ýmsu reglugerðir. Fulltrúar H- og E- listans sáu hinsvegar ekki tilefni til að fara í verkið strax og vantar því fjármögnun til að hrinda málinu af stað eins og sakir standa. Á meðan eru heilu bílfarmarnir af rusli fluttir að óþörfu í Herjólfi með tilheyrandi kostnaðarauka og dýrmætu plássi í Herjólfi.
- Viðbygging við Hamarsskóla er komin í umræðuna og hefur núverandi meirihluti alltaf tekið vel í málið þegar fulltrúar Sjálfstæðisflokksins hafa sett málið á dagskrá. Hins vegar hefði verið gaman að sjá meiri kraft í að keyra þetta mál áfram enda þörfin að verða brýn.
- Enn standa yfir framkvæmdir við gamla Ráðhúsið enda ákvað núverandi meirihluti að setja þar inn hluta af bæjarskrifstofunum þrátt fyrir að það lægi í augum uppi að það væri ekki skynsamlegt. Framkvæmdirnar enda líklega í mörg hundruð milljónum, ofan á kaupin á Íslandsbankahúsinu og tilheyrandi framkvæmdum sem þar þarf að fara í innanhúss til að getað einnig sett hluta af bæjarskrifstofum.
- Stórskipahöfn, nýr skipakantur. Stærri skip og aukin umsvif hafnarinnar eru farin að kalla allverulega á aðstöðu til að geta tekið við stærri skipum. Inn í framkvæmda- og hafnarráði á sér stað áframhaldandi vinna þessu tengt, þetta þarf hinsvegar að vinna í nánu samstarfi við ríkið og er því mikilvægt að fókusin fari að færast þangað sem allra fyrst.
Mikið byggt af íbúðum
Það þarf að leita tugi ára aftur í tímann til að finna eins miklar framkvæmdir af íbúðum líkt og nú eru í smíðum. Nánast allar íbúðarlóðir eru að klárast og fer þörfin fyrir nýtt íbúahverfi við malarvöllinn að verða raunhæfur kostur í náinni framtíð. Það fer því að verða aðkallandi að setja aukinn kraft í að undirbúa og hanna hverfið enda mikilvægt að vanda vel til verka á þessum spennandi reit.
Íþróttasvæðið
Á íþróttasvæðinu hefur mikið gengið á undanfarin ár, Herjólfshöllin sem er stækkanleg, útisvæði við sundlaugina, nýtt íþróttahús, stúka við Hásteinsvöll og fleira hefur komið íþróttalífinu vel. Á næstunni mun vonandi eiga sér stað umræða um framtíðarplön á þessu svæði og víðar enda er núna klár áfangaskýrsla frá hópi sem myndaður var fyrir þó nokkru síðan um þessi mál.
Bjart framundan í Eyjum
Það er freistandi þegar verið er að ræða framkvæmdir að nefna eitthvað af þeim spennandi framkvæmdum sem eru í pípunum þó að það sé ekki á vegum sveitarfélagsins. Til dæmis: Baðlónið á hrauninu, fiskeldi á landi, framkvæmdir í gamla símahúsinu, fiskvinnsla í botni við Friðarhöfn og nýr vegur þar um og svona mætti sem betur fer lengi telja enda listinn alls ekki tæmandi. Það má því með sanni segja að það sé bjart framundan í Eyjum.
Gleðilegt sumar,
Trausti Hjaltason,
bæjarfulltrúi Sjálfstæðisflokksins.
