Nokkur ungmenni hafa nú sagt opinberlega sögur af þeirri þörf sinni að stunda kynferðislegar athafnir undir berum himni í Vestmannaeyjum. Ber þar helst til fregna að markmið gjörningsins er að taka hann upp á myndband og birta á tilteknum samfélagsmiðli fyrir áskrifendur.
Upphaflega voru það hinar svokölluðu OnlyFans stjörnur sem greindu sjálfar frá gjörningum sínum í hlaðvarpsþætti sem DV.is fjallaði um. Það voru þau Ingólfur Valur Þrastarson og Ósk Tryggvadóttir sem sögðu söguna af því í síðustu viku þegar þau voru gripin glóðvolg í miðjum leikum í lystigarðinum Gaujulundi í Nýjahrauninu. Stikla af myndbandinu birtist fyrst á samfélagsmiðlinum Twitter þar sem sjá má Ingólf og Ósk að stunda kynlíf utandyra. „Nýtt myndband með Ósk kemur út í kvöld,“ skrifar Ingólfur í færslunni. „Ósk er riðið utandyra í Vestmannaeyjum rétt hjá litlum álfahúsum,“ Restin af myndbandinu var svo ætluð áskrifendum þeirra á Onlyfans.
OnlyFans er nefnilega vefsíða sem gerir almennum notendum kleift að selja efni sitt til áskrifenda gegn mánaðarlegu gjaldi. Heldur algengt er að efnið þar sé nektar- og kynlífsefni en síðan var þó ekki ætluð slíkum notum í upphafi heldur fyrir aðdáendur þekktra einstaklinga til þess að nálgast samfélagsmiðlaefni sem fáir höfðu aðgang að. Yfirleitt er þó efnið á einhvern hátt kynferðislegt eftir því hvernig vefurinn hefur þróast.
Síðar birtist svo önnur umfjöllun DV.is þar sem fleiri OnlyFans stjörnur sáu hosur sínar grænar yfir því að taka myndböndin upp í náttúrufegurð Eyjanna. Birta Blanco er þar með ein þeirra sem sést stunda munnmök með Ingólfi Val á golfvellinum í Vestmannaeyjum. Fram kemur að myndbandið sé nú aðgengilegt á vefnum.
Elsa Valgeirsdóttir, framkvæmdastjóri Golfklúbbs Vestmannaeyja, virtist ekki par sátt með not golfvallarins í þessum tilgangi þegar DV leitaði til hennar. Hún taldi uppátækið hræðilega leiðinlegt og virtist reið í garð OnlyFan fólksins. Elsa sagðist ekki hafa vitað af umræddum ástarleikjum né neinar ábendingar fengið. „Hvorki ábendingar né ósk um leyfi til að fá að nota völlinn undir slíkt,“ sagði Elsa. „Þetta er á engan hátt á ábyrgð Golfklúbbsins eða neins hér.“ bætti hún svo við að lokum.
Ekki er vitað hvort þetta séu einu tvö slík myndböndin sem finna má á umræddum vef eða hvort fleiri slík eigi eftir að birtast. Þess má geta að ekki er ólöglegt að stunda kynlíf í náttúrunni svo lengi sem slíkt særi ekki blygðunarkennd annarra og teljist velsæmisbrot. Klám er þó bannað hérlendis.
