Fyrir ári síðan fékk ég heilablóðfall. Lamaðist vinstra megin á líkamanum, fór um á hjólastól og fékk aðstoð við nær allar athafnir daglegs lífs. Á þessu ári sem liðið er hef ég náð góðum bata, er sjálfbjarga með allar athafnir og hef lært að ganga upp á nýtt. Þessi veikindi voru áminning um að nýta tímann sem okkur er gefinn vel og nú finnst mér rétti tíminn til að stíga fram og nýta krafta mína til þess að berjast fyrir hagsmunum íbúa og samfélagsins.
Í 16 ár hef ég unnið við erfið og vandmeðfarin verkefni á fjölmörgum sviðum bæjarins. Við störf mín hjá félagsþjónustunni hef ég séð vel hvernig daglegt líf er mörgum þungt og krefjandi. Ég vil standa vörð um hagsmuni þeirra og styðja við þarfir þeirra sem sárast þurfa aðstoð.
Samfélagið okkar stendur á sterkum grunni en til framtíðar þarf að byggja á stöðugleika og ábyrgð í rekstri. Það er óásættanlegt að gengið hafi verið á einn þriðja af sjóðum bæjarins á þessu kjörtímabili. Ég vil ábyrga og skynsama meðferð fjármagns.
Skynsemi í skipulagsmálum, Hraunbúðir rekið af okkur í nærsamfélaginu, velferðarþjónusta og skólamál í hæsta gæðaflokki, við eigum að vera þar á toppnum. Við þurfum að standa vörð um heilbrigðisþjónustuna okkar og of mörg dæmi eru um að einstaklingar hafi þurft að líða fyrir að sjúkraflutningum sé ábótavant. Oft er um mínútu spursmál að ræða og því er mikilvægt að sjúkraþyrla sé ætíð til taks.
Við eigum að búa í samfélagi þar sem allir hafa jafnan rétt til að raungera möguleika sína, án stéttar eða stöðu. Ég trúi því að tækifæri okkar samfélags séu óþrjótandi og mig langar að eiga möguleika á að taka þátt í að nýta þau tækifæri.
Í prófkjöri gefst bæjarbúum möguleiki á að hafa áhrif á það hvaða einstaklingar munu skipa framboðslista Sjálfstæðisflokksins, það er það næsta sem við komumst persónukjöri. Með þekkingu, reynslu, vinnusemi og ýmislegt fleira í farteskinu óska ég eftir stuðningi bæjarbúa í 2.-4. sæti í prófkjöri Sjálfstæðisflokksins á laugardaginn. Ég mun leggja mig alla fram og starfa af heilindum fyrir íbúa fái ég umboð til.
Margrét Rós Ingólfsdóttir
óska eftir 2.- 4. sæti í prófkjöri Sjálfstæðisflokksins á laugardaginn
