Berglind Björg, knattspyrnukona sem spilaði stórt hlutverk með landsliðinu á EM í sumar, er á förum frá norska liðun Brann. Þetta kemur fram í norskum miðlum í morgun.
Franska liði Paris Saint-Germain hefur keypt Berglindi, þetta er staðfest á vef Brann þar sem einnig kemur fram að hún hafi staðist læknisskoðun og sé búin að skrifa undir samning.
Berglind Björg, sem er 30 ára sóknarmaður, kom til Brann frá Hammarby í janúar á þessu ári. Hún skoraði eitt deildarmark og eitt bikarmark fyrir Brann.
Hún er ekki alveg ókunn Frakklandi, en hún spilaði með liðinu Le Havre 2020-2021 áður en hún fór til Hammarby og síðar Brann, þaðan sem hún flytur núna.
Berglind sagði í viðtali við Eyjafréttir í sumar að hún væri ánægð hjá Brann, þar sem allt væri til fyrirmyndar hjá þeim.
Fótbolti.net hefur þetta eftir þjálfara Brann:
„PSG gerði tilboð sem við gátum ekki hafnað. Því miður þá gat Berglind ekki spilað eins mikið fyrir okkur og við vonuðumst eftir, vegna meiðsla. En við óskum henni góðs gengis í framtíðinni,” segir starfandi þjálfari Brann og íþróttastjórinn Olli Harder.
Berglind Björg spilaði með ÍBV til 20 ára aldurs og fór þá í atvinnumennsku, hún er dóttir Sólveigar Önnu Gunnarsdóttur og Þorvaldar Heiðarssonar. Hún hefur spilað 66 landsliðsleiki fyrir Ísland og skorað í þeim 12 mörk.
