Þau er þó nokkur hér í bæ sem gera sér reglega ferð upp á Heimaklett. Það viðraði vel til slíkra ferða í dag og brá Már Jónsson kennari undir sig betri fætinum og skellti sér á klettinn eins og menn segja. Það sem gerði ferð Más á þessum fallega laugardegi sérstaka var sú merkilega staðreynd að þetta var ferð númer 4000 hjá kappanum. Pétur Steingrímsson var í för með Má og greindi frá þessu á facebook síðu sinni en hann tók einnig meðfylgjandi mynd.
Ef við miðum við það að Heimaklettur sé 283 metrar á hæð þá hefur kappinn klifrað samtals 1.132.000 metra eða sem nemur um 128 ferðum á Mount Everest. Hún hefur sjaldan átt betur við athugasemdin sem erlendur ferðamaður ritaði í gestabókina á Heimakletti fyrir nokkrum árum. “I would really like to meet this crazy guy named Már Jónsson and ask him why he climbs this mountain so much.”
