Í morgun komu fyrstu hrognin í seiðaeldisstöð Laxeyjar við botn Friðarhafnar. Þar með er starfsemin hafin þó í litlu magni sé. Hrognin koma frá Benchmark Genetics, áður Stofnfiskur, sem er leiðandi fyrirtæki í kynbótum, fiskeldi og framleiðslu á laxahrognum.
„Fyrsti skammturinn er 315.000 hrogn en í framtíðinni eigum við að geta tekið við allt að 1.200.000 hrognum í einu,“ segir Kristín Hartmannsdóttir verkefnastjóri. „Hrognin koma í frauðplastkössum og voru sótthreinsuð við komuna. Þau voru sett í klakskápana og þar eru þau í 84 daga. Eftir þessa 84 daga verða seiðin flutt yfir í startfóðrun, í svokölluðu RAS1 kerfi. Haustið 2024 stefnum við á að flytja seiði í áframeldið í Viðlagafjöru.“
Framkvæmdir eru á fullu á báðum stöðum og mörg handtök eftir en allt er á áætlun að því er kom fram hjá Kristínu. Um 120 manns koma að framkvæmdunum.
Mynd: Chris Malanka yfirmaður ferskvatnseldis, Guðmundur Sundström og Þórdís Þorvaldsdóttir við klakskápana.
