Bæjarráð ræddi um stöðu vatnsveitumála í Vestmanneyjum og þá afstöðu HS Veitna sem liggja fyrir í bréfum félagsins til sveitarfélagsins vegna viðgerðar á neðansjávarlögninni til Eyja. Fulltrúar sveitarfélagsins og HS-Veitna munu funda með innviðaráðuneytinu í vikunni til að fara yfir stöðuna sem upp er komin.
Niðurstaða
Bæjarráð telur nauðsynlegt að halda til haga að árið 2002 keypti Hitaveita Suðurnesja, nú HS Veitur hf., Bæjarveitur Vestmannaeyja af Vestmannaeyjabæ. Með þeim samningi yfirtók Hitaveita Suðurnesja hf. allar eignir, skuldir, réttindi og skyldur Bæjarveitna Vestmannaeyja. Af samningnum leiðir að einkaréttur sveitarfélagsins var framseldur til hitaveitunnar og hvílir sú skylda á HS Veitum hf. að fullnægja vatnsþörf almennings, heimila og atvinnufyrirtækja í Eyjum í samræmi við skyldur félagsins sem leiða af kaupsamningnum og lögum um vatnsveitumál.
Ábyrgð HS Veitna hf. á neðansjávarlögninni (NSL-3) milli lands og Eyja, rekstri hennar og viðgerð er skýr hvort sem litið er til samningsbundinna eða lagalegra skyldna félagsins. HS Veitur hf. hafa séð um allan rekstur, framkvæmdir og viðhald sem tengjast vatnsveitunni og fengið allar tekjur af veitunni frá því rétturinn var framseldur á sínum tíma. Sú afstaða HS Veitna hf. að félagið beri eingöngu að leita leiða til að sinna bráðabirgðaviðgerð á lögninni standast því ekki nánari skoðun séu þær ekki til þess fallnar að tryggja fullnægjandi vatnsþörf í sveitarfélaginu til framtíðar. Það er í samræmi við skyldur félagsins alfarið á ábyrgð þess en ekki Vestmannaeyjabæjar að taka afstöðu til tilboðs sem fyrir liggur um varanlega viðgerð á lögninni.
Bæjarráð Vestmannaeyja leggur áherslu á að það er á ábyrgð HS Veitna hf. að taka ákvörðun um hvernig félagið hyggst uppfylla skyldur sína um að sinna vatnsþörf í sveitarfélaginu. Á það meðal annars við um ákvarðanir um hvort og með hvaða hætti á að ráðast í viðgerðir á einu neðansjávarlögninni sem liggur til Eyja og er nú mikið löskuð. Bæjarráð telur mikilvægt að félagið grípi til allra þeirra aðgerða sem það telur nauðsynlegar til að sinna vatnsþörf í sveitarfélaginu með fullnægjandi hætti.
Bæjarráð Vestmannaeyja áréttar og tekur undir þau sjónarmið sem byggt hefur verið á af hálfu sveitarfélagsins í samskiptum við HS Veitur hf. vegna málsins og skorar á HS Veitur hf. að tryggja starfsemi vatnsveitunnar og vatnsþörf í sveitarfélaginu sem er þegar skert. Hér er um gríðarlega mikilvægt mál að ræða fyrir samfélagið í Vestmannaeyjum, bæði íbúa og atvinnustarfsemi sveitarfélagsins, og brýnt að hafist sé handa við að undirbúa varanlega viðgerð á neysluvatnslögninni til að tryggja afhendingaröryggi á vatni til Vestmannaeyja til framtíðar.
