Vestmannaeyingar geta frá og með deginum í dag pantað matinn sinn heim í Snjallverslun Krónunnar. Opnað verður fyrir pantanir í Vestmannaeyjum í dag, miðvikudag og verður boðið upp á heimsendingu alla virka daga. Mikil eftirspurn hefur verið eftir þjónustunni í bænum og býður Krónan nú þegar upp á heimsendingar á Suðurlandi, Suðurnesjum og Norðurlandi eystra.
„Það er afar ánægjulegt að geta kynnt Vestmannaeyingum fyrir nýrri þjónustu sem hefur gjörbreytt verslunarháttum og upplifun viðskiptavina okkar frá því að hún var kynnt til sögunnar. Þökk sé þessari nýju þjónustuleið getum við hugsað dæmið upp á nýtt og þjónustað landsbyggðina betur með bættu aðgengi að fjölbreyttu vöruúrvali á lágu verði, óháð staðsetningu viðskiptavina. Við erum spennt að sjá hvernig Vestmannaeyingar taka í heimsendingarþjónustuna okkar en bæjarbúar hafa verið duglegir við að hnippa í okkur til að minna á sig. Nú höfum við svarað kallinu og bjóðum Eyjamenn velkomna í hóp þeirra viðskiptavina sem geta nú nýtt sér Snjallverslun Krónunnar og alla þá kosti sem hún hefur upp á að bjóða,“ segir Guðrún Aðalsteinsdóttir, framkvæmdastjóri Krónunnar.
Allar pantanir verða teknar saman og keyrðar út frá verslun Krónunnar í Vestmannaeyjum og hefur undirbúningur og ferlið í heild gengið afar vel að sögn Ólafs Björgvins Jóhannessonar, verslunarstjóra Krónunnar í Vestmannaeyjum.
„Það er virkilega gaman að geta nú leyft bæjarbúum að notast við enn eina snilldina þegar kemur að matarinnkaupum, hvort sem það er fyrir heimilið eða fyrirtækið. Það er ekki langt síðan fyrstu sjálfsafgreiðslukassarnir litu dagsins ljós hér í Eyjum og í október 2022 fengu Eyjamenn fyrst tækifæri til að skanna og skunda en sú þjónustuleið hefur verið afar vinsæl innan verslunarinnar til að spara tíma við innkaupin. Hér er því mættur enn einn valkosturinn sem mun án efa einfalda bæjarbúum lífið því með þessu móti er leikur einn að panta vörurnar heim að dyrum í gegnum Snjallverslun Krónunnar,” segir Ólafur að lokum.
Viðskiptavinir fá fría heimsendingu ef pantað er fyrir 18 þúsund krónur eða meira í Snjallverslun. Hægt er að nálgast Snjallverslun Krónunnar í appi Krónunnar eða á kronan.is.
