Alls telja 71% landsmanna að ferðaþjónusta hafi haft jákvæð áhrif á íslenskt samfélag en tæp 12% telja áhrifin neikvæð. Þetta kemur fram í könnun sem Maskína framkvæmdi fyrir Samtök ferðaþjónustunnar, SAF, fyrr á árinu.

Í fréttatilkynningu SAF segir að viðhorfið sé mjög jákvætt í öllum landshlutum, þótt vægi og umfang ferðaþjónustunnar sé mismunandi eftir svæðum.

Hlutfall þeirra sem meta áhrif ferðaþjónustunnar jákvæð er hæst á Norðurlandi, 76,9%. Þá er hlutfallið 73,2% á Austurlandi, 72,8% á Vesturlandi og Vestfjörðum og 71,4% á Suðurlandi og Reykjanesi. Í Reykjavík er hlutfallið 70% og 68,8% í nágrannasveitarfélögum Reykjavíkur.

SAF bendir á að ferðaþjónustan hafi á undanförnum árum orðið stærsta útflutningsgrein landsins og verið mikilvæg fyrir atvinnu- og byggðaþróun víða um land.

„Það er mjög ánægjulegt að sjá hversu afgerandi meirihluti landsmanna telur ferðaþjónustuna hafa haft jákvæð áhrif á íslenskt samfélag. Sérstaklega er athyglisvert að sjá svo jákvætt viðhorf ríkjandi um allt land,“ segir Jóhannes Þór Skúlason, framkvæmdastjóri SAF.

Hann segir niðurstöðurnar undirstrika mikilvægi þess að stjórnvöld og atvinnugreinin taki höndum saman um aðgerðir sem geti stækkað ferðaþjónustukökuna og skapað aukin verðmæti og atvinnutækifæri fyrir samfélög um allt land.

Könnunin var lögð fyrir Þjóðgátt Maskínu dagana 7. til 12. maí 2026.