„Ég hef velt því fyrir mér hvort að ekki væri rétt að gefa Framsóknarflokknum færi á að standa við stóru orðin og hrinda í framkvæmd því loforði sem kjósendum var gefið. Svo mikið er víst að ég vona innilega að til þess geti komið. Þannig væri hægt að gefa þeim fyrirheit um að þeir verði varðir vantrausti í einhvern ákveðin tíma á meðan látið verður reyna á hversu mikil innistæða var í raun fyrir loforðunum. Eftir það verði síðan mynduð hefðbundin ríkisstjórn,“ segir Elliði Vignisson, bæjarstjóri í Vestmannaeyjum, í samtali við Eyjuna um stöðuna í stjórnmálunum nú þegar fimm dagar eru liðnir frá kosningunum og óformlegar þreifingar standa enn yfir á vegum formanns Framsóknarflokksins um mögulega stjórnarmyndun.