Samgöngur eru líka varnarmál. Ofurskattlagning þarf að skila sér til baka á þá staði sem gjalda fyrir skattlagninguna.

Nú kepptust allir fjölmiðlar landsins um að segja fréttir af því þegar að hringvegurinn fór í sundur við Jökulsá í Lóni. Upplýsingafulltrúi Vegagerðarinnar var fljótur að bregðast við og svara fyrir þetta, ,,við reynum að hraða þessu eins og unnt er.“

Á sama tíma lokaðist Þjóðvegurinn til Eyja og voru felldar niður ferðir vegna þess að ferjan sem er notuð til afleysinga Herjólfs á meðan hann er í slipptöku er óheppileg til siglinga á þessari leið enda ætluð til að sigla við aðrar aðstæður. Hvorki upplýsingafulltrúi Vegagerðarinnar né fjölmiðlar kippa sér upp við það enda því miður tíður viðburður að þjóðvegurinn til Eyja rofni.

Hvað þarf til að slík lokun verði að frétt og veki áhuga stjórnmálamanna sem bera ábyrgð á því að Þjóðvegurinn sé í ólagi?

Ég kalla eftir afstöðu stjórnmálamanna og þá sérstaklega ráðherrum málaflokkana, þ.e. innviðaráðherra sem fer með samgöngur og utanríkisráðherra sem fer með varnarmál.

Vegna þessa spyr ég ráðherrana tvo:

 – Hvenær á að koma með þessar 60 milljónir sem var búið að lofa í áframhaldandi rannsóknir á jarðgöngum?

Það stóð ekki á svari Eyjólfs Ármannssonar innviðaráðherra á opnum fundi í Eyjum fyrir kosningar, þessum fjármunum átti að redda strax eftir kosningar. Sá að Þorgerður Katrín Gunnarsdóttir utanríkisráðherra var að setja 60 milljónir í að ,,rampa upp í Úkraínu,, kannski kaldhæðni örlaganna að það er sama fjárhæð og þarf til að halda rannsóknum áfram við jarðgöng til Eyja. Það á ekki að þurfa að bíða í mörg ár til að taka næsta skref í málinu, því miður hefur það verið lenskan hingað til.

Breiðafjarðarferjan Baldur í Landeyjahöfn. Mynd/Óskar Pétur.

– Er komið plan hvernig á að laga Landeyjahöfn?

Fyrst stóð til að gera stórskipahöfn þar, en vegna fjármálahruns var hætt við það. Allir vita að höfnin er ekki tilbúin eins og lofað var, það er að hún væri stöðug heilsárshöfn.

– Er komið plan um að finna boðlega ferju sem getur leyst af Herjólf þegar hann fer í Slipp eða bilar?

Breiðafjarðarferjan Baldur var ekki með siglingaleyfi til að sigla þessa leið þegar hún kom, engar kojur eru um borð, hún tekur mun færri bíla og gáma o.s.frv. Baldur hentar ekki til siglinga á þessari sjóleið.

 Er komið plan um að hefja áætlunarflug til Eyja?

Ekki árleg skítaredding í nokkra mánuði svo að fólk komist um jólin, heldur stöðugt flug tvisvar sinnum á dag líkt og hefur verið til tugi ára atvinnulífinu og íbúum til sóma. Í dag er ekkert flug til Eyja.

– Er komið plan um að bregðast við metfjölda farþega til Vestmannaeyja og stöðugri aukningu sem kallar á aðra ferju til að sigla á móti Herjólfi yfir háannatíma á sumrin?

Það vissu það allir sem vita vildu að ágangur ferðamanna um Suðurlandið er slíkur að eftirspurn er meira en framboð þegar kemur að háannatíma, þá þarf aðra ferju sem siglir á móti Herjólfi. Slíkt mætti láta reyna á með því að leigja hentugt skip frá 1. júní til 30. ágúst.

– Er komið plan varðandi sjúkraþyrlu sem hefur verið rætt um að sé staðsett í Vestmannaeyjum?

Mál sem hefur þvælst í kerfinu um árabil en engar efndir.

– Er komið plan um aukið fjármagn í samgöngur vegna þeirra ofurskattlagningar á Sjávarútveginn þar sem milljarða aukning er á fyrirtæki á Landsbyggðinni?

– Er komið plan um hvernig á að auka framlög í Samgöngur sem er hluti af Varnarmálum landsins eftir auknar kröfur bandamanna okkar til þess að við setjum meira fjármagn í Varnarmál/Samgöngur?

Er ekki dauðafæri núna að efla samgöngur á þeim stöðum sem eru látnir gjalda fyrir ákvarðanir stjórnvalda um skattlagningu. Um leið auka útgjöld til varnarmála með því að auka fjármuni í samgöngur. Jarðgöng, ferjuleiðir, flugleiðir, stórskipahöfn og önnur samgöngumannvirki eru eins og Þorgerður Katrín veit allt liðir í því að efla varnir landsins. Við erum líklega nauðbeygð til að auka fjármuni í varnir og hér er því tækifæri til að slá tvær flugur í einu höggi.

Annars er mikill hugur í Eyjamönnum. Stórt landeldi er að rísa, til stendur að byggja glæsilegt hótel og baðlón, ferðaþjónustan í sókn og sjávarútvegurinn er enn ein af grunnstoðunum þrátt fyrir auka skattheimtu ríkisins. Þessi sókn mun hins vegar áfram kalla á bættar samgöngur og styrkingu innviða.

Þætti afskaplega vænt um að fá svar við þessum spurningum.

Með virðingu og vinsemd, Trausti Hjaltason

Íbúi á landsbyggðinni þar sem meira er greitt inn í ríkissjóð heldur en tekið út úr honum.

Greinin birtist í Morgunblaðinu í gær.