Áhersla á endurnýtingu og sjálfbærni

Í gær, þann 28. febrúar var haldið skapandi námskeið í Hvíta húsinu þar sem fatahönnuðurinn Selma Ragnarsdóttir leiddi þátttakendur inn í heim endurnýtingar. Á námskeiðinu var lögð áhersla á að endurnýta og laga það sem við eigum nú þegar – gefa flíkum nýtt líf í stað þess að henda þeim.

Selma deildi þekkingu sinni, hugmyndum og hagnýtum aðferðum sem gera fólki kleift að breyta, bæta og laga fatnað á einfaldan og skapandi hátt. „Stemningin var geggjuð og vinnugleðin mikil. Þátttakendur voru afar ánægðar með námskeiðið og fengu bæði innblástur og aukið sjálfstraust til að takast á við eigin verkefni heima fyrir. Áhuginn var slíkur að Selma hefur lýst yfir vilja til að koma aftur og halda annað námskeið – sem við hlökkum sannarlega til. Endurnýting og sjálfbærni eru málefni sem skipta samfélagið miklu máli og frábært að sjá slíkt frumkvæði í okkar nærumhverfi,“ segir Jóhanna Lilja Eiríksdóttir, kennari hjá Visku.