Tónlistarkonan Eló, eða Elísabet Guðnadóttir, býður Eyjafólki á tónleika laugardaginn 28. mars í KFUM & K húsinu við Vestmannabraut 5.

Á tónleikunum mun Eló flytja frumsamin lög, þar á meðal efni sem ekki hefur heyrst áður. Með henni á sviði verða Bergsteinn Sigurðarson, Hjálmar Carl Guðnason, Ívar Andri Klausen og Karl William Sigurðarson Olsen.

Eló var í fyrra útnefnd Bæjarlistamaður Vestmannaeyja og hyggst hún fagna þeim heiðri með tónleikunum um pálmasunnudagshelgina.

Aðgangur er ókeypis og allir velkomnir. „Það eina sem þarf er að mæta með bros á vör,“ segir í tilkynningu frá Eló.

Tónleikarnir hefjast kl 20:00.