Lundinn að setjast upp og þar með komið sumar hjá mér að venju. Ég bjóst reyndar ekki við því að hann myndi setjast upp í kvöld, enda svolítill vindur en það er líka hlýtt og það hentar lundanum vel.

Þetta er reyndar aðeins fyrr en síðustu árin, en samt á því tímabili sem ég hef séð lunda koma upp á. Hef reyndar aðeins tvisvar séð hann setjast upp þann 13. en þetta er svo sem á svipuðum tíma á hverju ári.

Í vetur bárust okkur slæmar fréttir af miklu magni af dauðum lunda úti í heimi, en reyndar fylgdi fréttinni mynd af aðeins einum dauðum lunda en nýlega skoðaði ég nokkrar svona síður og rakst þar á eina þar sem fjallað er um það að 22 þúsund lundar hefði rekið dauðir á land einhverstaðar í Frakklandi, en merkilegt nokkuð þá var í þessari umfjöllun bara myndir af lifandi lundum, sem segir svolítið um sannleiksgildi svona frétta enda eru þetta fyrst og fremst áróðurs fréttir frá öfga náttúruverndar samtökum.

En lundinn er mættur í milljónatali eins og alltaf og vonandi sjáum við mikið af honum í sumar og mikið af pysjum í lok sumars.

Ef ég man rétt þá eru núna liðlega 10 ár síðan lundinn fór að taka við sér aftur hér í Eyjum, sem er bara frábært.

Gleðilegt lunda sumar allir.

Georg Eiður Arnarson