Bilun kom upp í dýpkunarskipinu Álfsnesinu í morgun sem hefur áhrif á áframhaldandi vinnu við Landeyjahöfn. Þetta kemur fram í upplýsingum frá G. Pétri Matthíassyni, forstöðumanni samskiptadeildar Vegagerðarinnar.

„Tjakkur í Álfsnesinu sem stýrir einum af átta losunarhlerum skipsins brotnaði í morgun,“ segir Pétur.

Til að hægt sé að gera við bilunina þarf aðstoð kafara. „Það þarf að losa hlerann með kafara og síðan verður hann hífður upp og festur,“ segir hann.

Gert er ráð fyrir að viðgerðin taki nokkrar klukkustundir. „Reiknað er með að viðgerðin taki nokkra klukkutíma eða til klukkan 16 í dag,“ segir Pétur.