Menntasamfélagið Vestmannaeyjar

Það sem brennur helst á mér fyrir komandi kosningar eru leikskólamál í Vestmannaeyjum. Við búum í miklu menntasamfélagi sem hefur fengið verðskuldaða athygli með tilkomu þróunarverkefnisins “Kveikjum neistann”. Það er vel og skiptir sköpum að bæjarfélagið haldi áfram stuðningi sínum við verkefnið á meðan það er í þróunarferli og vonandi áfram að því loknu. Við megum þó ekki sofna á verðinum og gleyma uppbyggingu leikskólanna okkar. Nám barna hefst við fæðingu þess þegar það upplifir og lærir í gegnum daglegt líf með fjölskyldu sinni. Leikskólastigið tekur svo við og byggir ofan á fyrri reynslu barnsins en þar er lagður grunnur að framtíðar námi barnanna okkar. Því skiptir gríðarlega miklu máli, ef ekki öllu máli, að í leikskólum bæjarins sé stærstur hluti starfsfólks leikskólakennarar eða með aðra menntun sem nýtist í starfi. Hér er ég ekki að lasta reynslubolta sem starfa inn á leikskólunum án þess að vera með viðeigandi menntun. Þeir eru dýrmætir og af þeim hef ég sjálf lært mjög mikið. 

Við þurfum fleiri leikskólakennara

Eyjalistinn er með það á stefnuskrá sinni að styðja við sérfræðinema sem skuldbinda sig að námi loknu að starfa hjá Vestmannaeyjabæ í a.m.k tvö ár eftir útskrift. Að mínu mati er þetta heillaskref og sérstaklega mikilvægt fyrir leikskólana okkar en samkvæmt lögum um leikskóla eiga tveir þriðju starfsfólks að vera leikskólakennarar. Vestmannaeyjabær verður að axla ábyrgð á því að gera allt sem í sínu valdi stendur til að í leikskólum bæjarins séu sem flestir fagmenntaðir. Leikskólakennarar eru að kenna komandi kynslóðum alla daga, hver veit nema að leynist framtíðar bæjarfulltrúi í hópi leikskólabarna í dag! 

Eflum enn frekar sérkennsluúrræði

Annað mál sem við í Eyjalistanum brennum fyrir hvað varðar leikskólamál er að koma á stöðu fjöltyngisstjóra sem myndi sinna íslenskukennslu fyrir erlend börn í leikskólum bæjarins. Fjöldi erlendra barna er sífellt að aukast í bæjarfélaginu okkar og getum við verið stolt af því að öll tví- eða fjöltyngd börn fá í dag vikulega tíma hjá sérkennslustjóra í málörvun í íslensku. Til að taka dæmi eru núna 11 erlend börn í Víkinni, 5 ára deild af rúmlega 50 börnum sem sækja þar leikskóla. Viðbótarstöðugildi fjöltyngisstjóra myndi veita núverandi sérkennslustjórum meira svigrúm til þess að vinna í annarri tegund sérkennslu eins og forgreiningum fyrir ADHD og/eða einhverfu, aðstoða börn með hegðunarörðugleika, kvíða og þau sem þurfa á félagsfærniþjálfun að halda. 

Leikskólakerfið í Vestmannaeyjum

Þriðja málið sem við viljum leggja áherslu á er að vera með opin augu er varðar endurskoðun á nýtilkomnu leikskólakerfi sem var tekið í notkun um síðustu áramót. Það veitir foreldrum 30 klukkustundir gjaldfrjálsar á viku sem þeir mega skipuleggja eins og hentar fyrir hverja og eina fjölskyldu. Við teljum þó leikskólakerfið þurfa tíma fyrir foreldra og stjórnendur að venjast og læra inn á. Við höfum trú á kerfinu og markmiðum þess en þau eru til dæmis að börn séu styttri vinnudag í leikskólanum til að auka vellíðan þeirra, að faglegt starf eflist með því að bæta skipulag starfsfólks sem eykur velferð þeirra í starfi. 

Nýr leikskóli í Löngulág

Eins og má sjá hefur Eyjalistinn ekki einungis hugsað um uppbyggingu nýs leikskóla heldur einnig velferð og þróun faglegs starfs innan leikskólanna. Það er á stefnuskrá Eyjalistans að opnaður verði nýr leikskóli á kjörtímabilinu en nú þegar hefur verið skipulagt svæði fyrir hann í nýju hverfi í Löngulág. Það er vel en það þarf að hugsa stórt, að hér rísi a.m.k 10 deilda leikskóli með möguleika á stækkun um tvær – þrjár deildir til að mæta ört vaxandi íbúafjölda. Eins þarf að hugsa um hvernig leikskólinn er byggður, fá fagfólkið og leikskólabörn með að borðinu er kemur að hönnun, litavali, hönnun á útisvæði o.s.frv. Leikskólabörn geta nefnilega virkilega haft áhrif og sést það til dæmis á nýjum leikskóla á Selfossi, Goðheimum en þar fengu börn að taka þátt í hönnun útisvæðis.

Veljum faglega nálgun hvað varðar leikskólamál þann 16.maí nk. – kjósum Eyjalistann!

Hildur Róbertsdóttir

Höfundur er varabæjarfulltrúi og skipar 4.sæti á framboðslista Eyjalistans.