Kvennalið ÍBV í handbolta tók á móti Val í fjórða leik liðanna í úrslitaeinvíginu um Íslandsmeistaratitillinn í Olís deild kvenna í Eyjum í kvöld. Eyjakonur þurftu nauðsynlega á sigri að halda til að halda sér í baráttunni og knýja fram oddaleik. 

Valskonur byrjuðu leikinn betur og voru yfir á upphafsmínútum fyrri hálfleiks. Eyjakonur unnu sig betur inn í leikinn og náðu tveggja marka forystu, 10-8, eftir sautján mínútur. Eyjakonur voru sterkari aðilinn út fyrri hálfleikinn og náðu mest þriggja marka forskoti. Staðan í hálfleik 16-14.

Valskonur reyndust sterkari í lokin

Valskonur komu ákveðnar til leiks í síðari hálfleik. Eftir fimmtán mínútur í síðari hálfleik voru Eyjakonur aðeins búnar að skora þrjú mörk á meðan Valskonur skoruðu átta. Valur leiddi þegar stundarfjórðungur var eftir með fjórum mörkum, 19-22. Eyjakonur minnkuðu muninn í eitt mark, 23-24, þegar átt mínútur voru til leiksloka en nær komust þær ekki. Valskonur reyndust sterkari á lokakafla leiksins og unnu að lokum fjögurra marka sigur, 26-30, og tryggðu sér Íslandsmeistaratitillinn. Valskonur eru því handhafar allra þriggja titlana þetta árið, en þær urðu bikarmeistarar og deildarmeistarar fyrr í vetur. ÍBV endar tímabilið í öðru sæti í bæði úrslitakeppninni og í deildinni.

Sandra Erlingsdóttir var eins og svo oft áður frábær í liði ÍBV og var hún markahæst í leiknum með tólf mörk. Birna Berg Harladsdóttir kom næst á eftir henni með sjö mörk. Ólöf Maren Bjarnadóttir átti góðan leik og varði hún 16 skot í marki ÍBV.

Mörk ÍBV: Sandra Erlingsdóttir 12 mörk, Birna Berg Haraldsdóttir 7, Amelía Dís Einarsdóttir 3, Birna María Unnarsdóttir 2, Britney Emilie Florianne Cots 2.

Sigfús Gunnar Guðmundsson tók nokkrar myndir á leiknum.