Þrír ísfisktogarar, Birtingur NK, Bergey VE og Vestmannaey VE, landa í Neskaupstað í dag. Það er óvenjulegt að þrír togarar komi til löndunar þar sama dag, að því er fram kemur á vef Síldarvinnslunnar. Jafnframt er síld landað af fullum krafti og því mikið um að vera á bryggjunni.

Löndun úr Birtingi hófst klukkan sjö í morgun. Skipið er með rúmlega 80 tonn, mestmegnis þorsk og karfa.

Í kjölfarið verður landað úr Eyjaskipunum Bergey og Vestmannaey, sem bæði koma úr stuttum veiðiferðum. Vestmannaey landaði síðast á mánudag. Arnar Richardsson, rekstrarstjóri skipanna, segir á vef Síldarvinnslunnar að Bergey sé með rúmlega 60 tonn og Vestmannaey rúmlega 30 tonn. Uppistaða aflans hjá báðum skipum er þorskur og ýsa.

Vegna brælu er búist við að skipin haldi ekki aftur til veiða fyrr en á laugardag.