Sanddæluskipið Sebastiano Caboto fjarlægði um 32 þúsund rúmmetra af efni úr hafnarmynni Landeyjahafnar og framan við hafnargarðana dagana 26.–28. september. Skipið er á vegum dýpkunarfyrirtækisins Jan De Nul. Þetta kemur fram í svari G. Péturs Matthíassonar, upplýsingafulltrúa Vegagerðarinnar, við fyrirspurn Eyjafrétta.

Að auki voru nokkur þúsund rúmmetrar af efni blásnir af grynningum með því að dæla sjó í gegnum framrör skipsins.

Að sögn G. Péturs er dýpi í hafnarmynninu gott þessa stundina, eða um sjö til átta metrar. Hann bendir þó á að leiðinlegt veður sé í vændum á miðvikudag og fimmtudag og að dýpið geti því minnkað hratt.

Mögulega gefast gluggar til frekari dýpkunar um komandi helgi, að sögn G. Péturs.