Samkvæmt septembertalningu HMS eru 26 íbúðir í byggingu í Vestmannaeyjum og aðrar 20 fullbúnar en hafa ekki verið teknar í notkun. Nokkur sveitarfélög á Suðurlandi eru meðal þeirra sem mest byggja miðað við stærð íbúðastofnsins.

Alls eru 46 íbúðir á mismunandi stigum byggingarferlisins í Vestmannaeyjum samkvæmt nýjustu talningu Húsnæðis-, mannvirkja- og skipulagsstofnunar, HMS. Þar af eru 20 á framvindustigi 7, sem merkir að byggingu sé að mestu lokið samkvæmt hönnunargögnum en íbúðin hafi ekki verið tekin í notkun.

Hinar 26 íbúðirnar eru á mismunandi stigum framkvæmda. Ein er á framvindustigi 2, þar sem vinnu við undirstöður er lokið. Sextán eru á framvindustigi 3, þar sem botnplata er tilbúin og vinna við burðarvirki hafin. Átta eru á framvindustigi 4 og teljast fokheldar, en ein er á framvindustigi 5, þar sem frágangur er lengra kominn.

Ölfus með hæsta hlutfallið

Samtök sunnlenskra sveitarfélaga, SASS, fjalla um niðurstöðurnar á vef sínum og benda á umfang uppbyggingar á Suðurlandi miðað við stærð íbúðastofns sveitarfélaganna.

Ölfus er með hæsta hlutfall íbúða í byggingu á landsvísu, eða 15,2% miðað við fjölda fullbúinna íbúða sem fyrir eru. Meðal annarra sunnlenskra sveitarfélaga með hátt hlutfall eru Skeiða- og Gnúpverjahreppur, Hveragerðisbær, Grímsnes- og Grafningshreppur og Hrunamannahreppur.

Uppsöfnun fullbúinna íbúða kemur jafnframt fram í stærri sveitarfélögum landshlutans. Í Árborg eru 194 íbúðir fullbúnar en ónotaðar, í Ölfusi 117 og í Hveragerði 47, samkvæmt samantekt SASS.

Hægt hefur á uppbyggingu á landsvísu

Á landinu öllu voru 6.216 íbúðir í byggingu í september, að fullbúnum en ónotuðum íbúðum frátöldum. Það er 11% fækkun frá því í mars.

Til viðbótar voru 1.855 íbúðir fullbúnar en höfðu ekki verið teknar í notkun, eða um 85% fleiri en ári áður. Þá hófust framkvæmdir við 772 íbúðir á síðustu sex mánuðum. Nýjar framkvæmdir milli talninga hafa ekki verið færri frá því HMS hóf talningarnar árið 2021.

Nánari upplýsingar má finna í septembertalningu HMS 2026.