Fórnarlamba umferðarslysa var minnst í Vestmannaeyjum í gær, sunnudaginn 15. nóvember. Minningarmessa fór fram í Landakirkju klukkan 13 og um kvöldið var haldin kertastund við kirkjugarðshliðið. Óskar Pétur tók myndir á báðum stöðum.
Í messunni sagði Þóranna Sigurbergsdóttir frá reynslu sinni af því að missa son sinn í bílslysi. Viðbragðsaðilar í Eyjum tóku þátt í messunni og kirkjugestum gafst tækifæri til að kveikja á kerti til minningar um þau sem látist hafa í umferðarslysum. Kór Landakirkju söng undir stjórn Kitty Kovács.
Kertastundin við kirkjugarðshliðið hófst klukkan 20. Alls voru minningarstundir haldnar á 17 stöðum á landinu í tilefni af alþjóðlegum minningardegi um fórnarlömb umferðarslysa, samkvæmt innviðaráðuneytinu.
Á minningardeginum í ár var sjónum sérstaklega beint að ungu fólki í umferðinni og hættunni sem fylgir hraðakstri. Í ávarpi við minningarathöfn í Fossvogi boðaði Eyjólfur Ármannsson innviðaráðherra fræðsluátak um hraðakstur í samstarfi við ungmenni, foreldra og skólasamfélagið.
Ráðherra sagðist einnig ætla að kynna tillögur að breytingum á umferðarlögum í samráðsgátt stjórnvalda á næstu dögum. Meðal markmiða þeirra er að styrkja heimildir lögreglu til að bregðast við alvarlegum umferðarlagabrotum.
Myndir Óskars Péturs hér að neðan eru frá minningarmessunni í Landakirkju og kertastundinni við kirkjugarðshliðið.