Hjónin Magnús Bragason og Adda Jóhanna Sigurðardóttir hafa ákveðið að setja Hótel Vestmannaeyjar á sölu. Magnús og Adda festu kaup á hótelinu árið 2012 en þau hafa síðan meðal annars ráðist í stækkun á húsnæðinu sem býr yfir 43 herbergjum auk 6 herbergja á samtengdu gistiheimili. Magnús sagði í samtali við Eyjafréttir reksturinn standa vel og fjárhaginn vera í góðu lagi en salan komi til að persónulegum ástæðum. „Það er ekkert leyndarmál að það er heilsubrestur hjá mér sem ræður miklu í þessari ákvörðun okkar. Við gerum okkur grein fyrir því að þetta ferli allt getur tekið tíma og því fannst okkur þetta vera rétti tímapunkturinn.“
