Brunaæfing fór fram föstudaginn 2. október í Kjarnanum, íbúðakjarna fyrir fatlað fólk í Vestmannaeyjum. Markmiðið var að æfa viðbrögð við mögulegum eldsvoða og tryggja að íbúar og starfsfólk þekki verklag og öruggar rýmingarleiðir. Þetta kemur fram í frétt á vef Vestmannaeyjabæjar.

Áður en æfingin hófst fengu íbúar og starfsfólk fræðslu um eldvarnir og viðbrögð ef eldur kemur upp. Friðrik Páll Arnfinnsson slökkviliðsstjóri aðstoðaði við æfinguna og veitti ráð um viðbrögð og öryggi.

Samkvæmt frétt bæjarins gekk æfingin mjög vel og starfsfólk kom íbúum á örugga staði á örskömmum tíma. Hún gaf jafnframt tækifæri til að fara yfir verklag og aðbúnað og greina atriði sem huga þarf betur að til að tryggja öryggi og aðgengi allra við neyðaraðstæður.

Í fréttinni er bent á að brunaæfingar séu mikilvægur þáttur í öryggisstarfi og gefi bæði íbúum og starfsfólki tækifæri til að æfa viðbrögð við neyð.