Umhverfis- og skipulagsráð Vestmannaeyja hefur tekið til umræðu útbreiðslu ágengra gróðurtegunda í Eyjum, einkum lúpínu og kerfils, og vill grípa til aðgerða til að vernda viðkvæm vistkerfi og jarðminjar.

Fram kemur í bókun ráðsins að töluverð útbreiðsla hafi orðið bæði í Gamlahrauni og Eldfellshrauni. Undanfarin ár hafi verið reynt að takmarka útbreiðslu lúpínu í Gamla hrauni þar sem svæðið einkennist af mosagrónu hrauni og lynggróðri.

Á Eldfellshrauni hafi lúpínan hins vegar víða nýst vel til landgræðslu. Hún hafi þó einnig dreift sér inn á svæði þar sem verndargildi sé mikið, meðal annars á mosagróin hraun og jarðminjar sem skráðar eru á náttúruminjaskrá, þar á meðal við Páskahraun.

Í bókuninni kemur fram að lúpína víki í sumum tilvikum fyrir öðrum gróðurtegundum, en að kerfill virðist nú vera að ná sér á strik og dreifast hratt um svæðið.

Ráðið telur mikilvægt að hefta frekari útbreiðslu ágengra gróðurtegunda í Vestmannaeyjum og vernda bæði vistkerfi og jarðminjar. Skipulags- og umhverfisfulltrúa hefur verið falið að vinna tillögur að aðgerðum til skemmri og lengri tíma sem miða að því að takmarka útbreiðsluna.