Þessa dagana eru 80 eldri borgarar frá Vestmannaeyjum í Puerto de la Cruz á norðurhluta Tenerife undir tryggri leiðsögn Aldísar Atladóttur og Friðfinns Finnbogasonar. Allt skipulag er til fyrirmyndar og alltaf eitthvað um að vera á hverjum degi. Ekki sól alla daga en frábært veður og passlegur hiti.

Hópurinn dvelur á H10-hótelinu sem stendur rétt við ströndina í dásamlegu umhverfi þar sem samfelld göngugata liggur meðfram ströndinni. Þar er magnað mannlíf, ótal viðburðir á hverju götuhorni og nóg af verslunum og glæsilegum veitingastöðum. Þetta er því sannkallaður draumastaður.

Boðið er upp á gönguferðir á hverjum morgni og á miðvikudaginn var farið í glæsilega skoðunarferð sem margir nýttu sér. Morgun- og kvöldverður eru innifaldir í pakkanum og fer afar vel um gesti. Sundlaugarbarinn er vinsæll og þar skapast oft mikið fjör.

Á kvöldin safnast hópurinn saman við laugina og í skemmtisal hótelsins þar sem boðið er upp á ný skemmtiatriði á hverju kvöldi.

„Við Friðfinnur erum mjög þakklát fyrir hvað allt hefur gengið vel og fólkið er ánægt. Við getum verið stolt af félaginu okkar. Allir leggjast á eitt til að gera ferðina sem ánægjulegasta og allt hefur gengið upp. Markmiðið er einfalt – engin vandamál, bara verkefni og lausnir,“ segir Aldís fararstjóri ánægð með sitt fólk.