Umhverfis- og skipulagsráð Vestmannaeyja leggur til að gert verði ráð fyrir kostnaði við bætta aðstöðu og aðkomu við Sprönguna í fjárhagsáætlun bæjarins fyrir árið 2027.

Sprangan hefur mikið menningar- og sögulegt gildi fyrir Vestmannaeyjar og er jafnframt vinsæll áfangastaður ferðamanna. Ábendingar hafa hins vegar borist um erfiða aðkomu að svæðinu, sérstaklega fyrir rútur, auk þess sem ásýnd þess hefur verið gagnrýnd.

Fyrirtækið Steini og Olli hafði samkomulag við Vestmannaeyjabæ um afnot af svæði við Sprönguna til efnisvinnslu. Samkomulagið er nú útrunnið og samkvæmt nýjum samningi bæjarins við aðila sem sinna efnisvinnslu í Vestmannaeyjum á starfsemin við Sprönguna að víkja af svæðinu.

Ráðið fól starfsmönnum bæjarins að ræða við forsvarsmenn Steina og Olla um að fjarlægja búnað og efni af svæðinu. Jafnframt verður horft til endurheimtar svæðisins og framtíðarfyrirkomulags aðkomunnar að Spröngunni.