Bókunarkerfi Herjólfs er enn niðri en félagið hefur birt siglingaáætlun morgundagsins svo farþegar geti skipulagt ferðir sínar.

Siglt verður frá Vestmannaeyjum kl. 09:30, 12:00, 14:30, 17:00 og 19:30. Frá Landeyjahöfn verður siglt kl. 10:45, 13:15, 15:45, 18:15 og 20:45.

Fram kemur í tilkynningu frá Herjólfi að ekki sé hægt að bóka farartæki í ferðirnar kl. 09:30, 10:45, 17:00 og 20:45 þar sem þær hafi verið fullbókaðar áður en bókunarkerfið datt út.

Herjólfur biður farþega um að mæta tímanlega og þakkar jafnframt fyrir þolinmæði og skilning undanfarna daga meðan unnið hefur verið að því að koma kerfinu aftur í lag.

Þá bendir félagið farþegum sem hyggjast ferðast á mánudag eða þriðjudag á að aðstæður til siglinga í Landeyjahöfn séu ekki hagstæðar um þessar mundir.

„Við hvetjum farþega til að fylgjast með miðlum okkar ef gera þarf breytingar á áætlun,“ segir í tilkynningunni.

Tilkynning um siglingar á mánudag verður gefin út í síðasta lagi klukkan 06:00 á mánudagsmorgun.