Eyjamaðurinn Elliði Snær Viðarsson átti frábæran leik fyrir Gummersbach í þýsku úrvalsdeildinni í handbolta í gær. Línumaðurinn knái skoraði níu mörk úr tíu skotum þegar þeir unnu átta marka sigur á Kiel, 26-34, á útivelli. Leikurinn var nokkuð jafn og var staðan í hálfleik til að mynda 15-14, Kiel í hag. Gummersbach voru svo mun sterkari á lokakafla leiksins og lönduðu öruggum sigri.

Gummersbach situr, eftir sigurinn, í sjötta sæti deildarinnar með 31 stig. Liðið er þremur stigum á eftir Lemgo og Kiel sem sitja í sætunum fyrir ofan. Gummersbach á þó leik til góða.