Saltfiskurinn gegnir lykilhlutverki í jólahaldinu í Portúgal, þar sem eftirspurnin eykst verulega þegar hátíðin nálgast. Hjá fyrirtækinu Grupeixe, dótturfyrirtæki Vinnslustöðvarinnar, stendur nú yfir annasamasti tími ársins við framleiðslu og kynningu á úrvals jólasaltfiski sem ber heitið Bacalhau Especial – Cura superior 9 meses.

Fiskurinn, sem byggir á íslensku hráefni, hefur verið látinn þroskast í salti í níu mánuði áður en hann er þurrkaður og pakkaður. Með þeirri meðferð fær hann ríkara bragð og áferð sem portúgalskir neytendur kunna vel að meta. Varan er markaðssett undir yfirskriftinni A obra-prima do Atlântico – Meistaraverk Atlantshafsins – og seld í takmörkuðu magni í 36 verslunum Auchan víðs vegar um landið.

Í umfjöllun sem birtist á vef Vinnslustöðvarinnar (vsv.is) segir frá verkefninu, samstarfi Grupeixe við smásölukeðjuna Auchan og þeirri áherslu sem lögð er á gæði, uppruna og íslenskan fisk sem lykilhráefni. Framkvæmdastjóri Grupeixe, Nuno Araújo, segir að íslenskur fiskur sé hjarta starfseminnar og að verkefnið undirstriki mikilvægi þess að miðla gæðum og sögu vörunnar til neytenda.

Lesa má ítarlegu umfjöllunina í heild sinni hér.