Flugeldaverð óbreytt hjá Björgunarfélagi Vestmannaeyja
Þakklætisvottur til bæjarbúa fyrir stuðninginn
Adólf Þórsson félagi í Björgunarfélagi Vestmannaeyja með Vestmannaeyjatertuna fyrir framan sig.

Björgunarfélag Vestmannaeyja hefur ákveðið að hækka ekki verð á flugeldum milli ára. Að sögn Adólfs Þórssonar, umsjónarmanns flugeldasölu hjá félaginu, er ákvörðunin meðvituð og ætluð sem þakklætisvottur til bæjarbúa fyrir þann stuðning sem þeir hafa sýnt félaginu í gegnum árin.

Aðspurður hvernig flugeldasalan gangi í ár segir Adólf að salan fari jafnan rólega af stað, líkt og fyrri ár. „Mesti þunginn kemur alltaf á síðustu tveimur dögunum. Það er augljóst að fólk vill halda í hefðina og um leið leggja sitt af mörkum til félagsins. Við stöndum klár með okkar fólk á flugeldamarkaðnum svo allir fái eitthvað við sitt hæfi til að sprengja,“ segir hann.

Ákvörðunin um að halda verðinu óbreyttu var tekin með bæjarbúa í huga. Aðspurður um ástæðuna segir Adólf að félagið hafi viljað gera eitthvað sem skilaði sér beint til fólksins í bænum. „Bæjarbúar hafa staðið með okkur í gegnum árin – í raun frá 1918 – og við viljum sýna það í verki. Með því að halda verðinu óbreyttu viljum við segja: takk fyrir stuðninginn. Verðið í Eyjum er að mestu leyti undir eða sambærilegt því sem gerist á höfuðborgarsvæðinu.“

Stuðningur bæjarbúa skiptir starfsemi Björgunarfélagsins miklu máli. Aðspurður segir Adólf hann vera algjörlega lykilatriði. „Þetta er félag sem byggir á samstöðu og þátttöku sjálfboðaliða sem vilja aðstoða sitt nærsamfélag. Flugeldasalan er ein af mikilvægustu tekjuleiðunum okkar og styður beint við allt það öryggis- og björgunarstarf sem við sinnum allt árið.“

Tekjurnar af flugeldasölunni nýtast samkvæmt Adólfi meðal annars til viðhalds búnaðar, endurnýjunar tækja, þjálfunar og almenns reksturs félagsins. „Þetta er ekki bara eitthvað sem er gott að hafa – þetta er nauðsynlegt til þess að við getum brugðist hratt og örugglega við þegar á þarf að halda, bæði á sjó og á landi,“ segir hann.

Spurður hvort hann telji að það skipti fólk máli að vita að verð hækki ekki og að með því sé verið að þakka bæjarbúum, segir Adólf svo vera. „Í Eyjum hefur alltaf verið sterkur samstöðukraftur. Þegar fólk kaupir flugelda hjá BV er það í raun að styðja við sitt eigið öryggi og sitt samfélag.“

Að lokum vill Adólf senda bæjarbúum sérstakar þakkir. „Ég vil bara þakka innilega fyrir stuðninginn. Þetta félag hefur verið hluti af samfélaginu í yfir hundrað ár og það er vegna þess að Vestmannaeyingar hafa staðið með okkur. Við vonum að fólk komi, kíki við og finni að þetta er ekki bara flugeldasala, þetta er samstaða og þakklæti.“

Opnunartímar flugeldamarkaðar Björgunarfélags Vestmannaeyja

29. desember: 13:00–22:00
30. desember: 10:00–22:00
31. desember: 09:00–16:00

Þrettándinn: 13:00–19:00

Nýjustu fréttir

Fréttir
Gul viðvörun – Austanhríð
Íþróttir
Kristín Klara lék í sigri Íslands á Serbíu
Íþróttir
Þar sem andinn er góður og stemningin í klefanum frábær
Kynning
Bílaumboðið Una selur XPENG bíla á Íslandi 
Áhugavert
Árni Árnason – Þurrabúðarlíf í Eyjum um aldamótin 1900
Bæjarmálin
34,8 milljónir í fjárhagsaðstoð í fyrra
Úr blaði Eyjafrétta
Safna fyrir innileikvelli fyrir börn 
Fréttir
85 ára saga Rauða krossins í Eyjum – opið hús í Arnardrangi á sunnudag
Mest lesið

Góð ráð fyrir siglingu

Sjóveiki

Hvað er sjóveiki?

Sjóveiki er misræmi milli skynfæra líkamans sem senda boð til heilans um hreyfingu – kyrrstöðu.

Þegar einstaklingur er úti á sjó þá nema skynjarar í vökvafylltum gangi í innra eyra hreyfingu og senda boð til heilans að einstaklingur sé á hreyfingu. Augun senda hins vegar boð til heilans um að viðkomandi sé kyrr. Heilinn á erfitt með að vinna úr þessum misvísandi og ósamræmdu upplýsingum og sendir skilaboð til magans um að tæma sig – þ.e. veldur uppköstum.

Einkenni sjóveiki eru þreyta, ógleði, svimi, svitakóf og uppköst.

Góð ráð til að hindra sjóveiki:

  • Góð hvíld daginn fyrir brottför. Að fara seint að sofa og snemma um borð í bát fer ekki vel saman ef fólk er hætt við sjóveiki.
  • Forðist áfenga drykki daginn fyrir brottför
  • Forðist djúpsteiktan, brasaðan eða saltan mat daginn fyrir siglingu.
  • Borðið góðan morgunverð. Borðið gjarnan hvítt brauð, hafragraut og ávexti þó ekki sítrus ávexti.
  • Forðist mikið koffein. Mikið kaffi er ekki það sem maganum líkar fyrir sjóferð.
  • Hafðu mat með þér á sjó. Gott er að hafa samlokur með kjúklingi eða kalkún. Kjötið er fitusnautt og brauðið er róandi í maga. Hafðu endilega eitthvað til að grípa í sem er létt í maga. Bananar eru mjög góðir til að narta í ef þú finnur fyrir ógleði en einnig er gott að hafa létt kex eða annað sem er ekki salt eða fitumikið.
  • Drekkið vel af vatni en einnig er gott er að drekka kóla drykki eða engiferöl í sjóferðinni

Lyf við sjóveiki þ.e. lyf sem slá á einkennin og fást án lyfseðils í apóteki.

  • Koffínátín – fæst án lyfseðils
  • Postafen – fæst án lyfseðils
  • Scopolamin plástur – lyfseðilsskyltEinnig má fá armbönd gegn ferðaveiki sem sumir telja að hjálpi.

Önnur ráð:

  • Engifer er jurt sem nýlega hefur fengið aukna athygli vegna þess að því er haldið fram að hún geti slegið á ógleði sem fylgir sjóveiki. Til forna tuggðu kínverskir sjómenn engiferrót til að draga úr sjóveiki. Flest lyf sem virka á ógleði verka á heilann en engifer virkar aðeins á magann. Ráðlagt er að taka 1000 mg. hylki hálftíma fyrir brottför. Einnig má taka eitt eða tvö 500 mg. hylki sem eru til viðbótar á ferðalaginu. Ekki er ráðlagt að drekka coke með engifertöflum.
  • Piparminta og te eru einnig gömul húsráð við ferðaveiki.
  • Sumum finnst betra að taka sýrujafnandi töflur, Alminox eða slíkt áður en þú heldur á sjó og þá er gott að hafa box með út á sjó.

Hvar í skipinu er best að vera o.fl.

  • Minna finnst fyrir hreyfingu og veltingi ef maður er staddur næst miðju bátsins.
  • Mörgum finnst gott að vera í kulda, t.d.að vera úti á dekki og láta vindinn leika um sig.
  • Matarlykt fer illa í þá sem hætt er við sjóveiki og einnig pústið frá bátnum.

Þungun:

Þungaðar konur sem þjást af sjóveiki mega nota koffinátín í litlum skömmtum en best er að ráðfæra sig við lækni eða lyfjafræðing.
Þunguðum konum er ekki ráðlagt að nota engifer þar sem það er ekki staðfest hvort það geti haft skaðleg áhrif á fóstur.

Eyjafréttir
Keyrt af  GDPR Cookie Compliance
Friðhelgisyfirlýsing

Þessi vefsíða notar fótspor til að við getum veitt þér bestu notendaupplifun. Upplýsingar um fótspor eru geymdar í vafranum þínum og framkvæma aðgerðir eins og að þekkja þig þegar þú kemur aftur á vefsíðu okkar og hjálpa teymi okkar að skilja hvaða hluta vefsíðunnar þér finnst áhugaverðast og gagnlegast.