Foreldrar nemenda við Grunnskóla Vestmannaeyja eru hvattir til að mæta á kynningarfund um þróunarverkefnið Kveikjum neistann á morgun, miðvikudaginn 7. október.

Hermundur Sigmundsson, prófessor og hugmyndasmiður verkefnisins, verður með erindi á fundinum þar sem hann mun meðal annars fjalla um hugmyndafræðina að baki verkefninu, hvers vegna ráðist var í það og þær áherslur sem liggja því til grundvallar.

Kveikjum neistann hófst við GRV haustið 2021 og er langtíma þróunar- og rannsóknarverkefni. Markmið þess er meðal annars að bæta líðan og námsárangur nemenda og efla áhugahvöt þeirra. Áhersla er lögð á læsi og lesskilning, stærðfræði, náttúrufræði, hreyfingu og hugarfar nemenda.

Foreldrar eru hvattir til að mæta og kynna sér betur þá vegferð sem skólinn hefur verið á með verkefninu undanfarin ár.

Fundurinn hefst klukkan 16:30 í sal Barnaskólans.