Messa til minningar um fórnarlömb umferðarslysa verður í Landakirkju klukkan 13 á sunnudag, 15. nóvember. Þar segir Þóranna Sigurbergsdóttir frá reynslu sinni af því að missa son sinn í bílslysi. Um kvöldið verður kertastund við kirkjugarðinn klukkan 20.

Fram kemur í tilkynningu frá Landakirkju að viðbragðsaðilar í Eyjum taki þátt í messunni. Kirkjugestum gefst kostur á að kveikja á kerti til minningar um þau sem látist hafa í umferðarslysum eða tendra bænakerti. Kór Landakirkju syngur undir stjórn Kitty Kovács. Öll eru velkomin í messuna.

Í tilkynningunni er lögð áhersla á að raddir þeirra sem misst hafa ástvini í umferðarslysum fái að heyrast. Frásögn Þórönnu varpar ljósi á það sem fjölskyldur og ástvinir takast á við eftir slíkan missi.

Vestmannaeyjabær hefur jafnframt tilkynnt um kertastund við kirkjugarðinn um kvöldið. Dagskrá í Vestmannaeyjum

Minningarstundir á að minnsta kosti 17 stöðum

Alþjóðlegur minningardagur um fórnarlömb umferðarslysa er haldinn þriðja sunnudag í nóvember ár hvert. Samkvæmt fréttatilkynningu Samgöngustofu eru minningarstundir fyrirhugaðar á að minnsta kosti 17 stöðum á landinu og hafa þær aldrei verið fleiri.

Í nýrri könnun Samgöngustofu sögðust rúmlega 26 prósent svarenda hafa misst náinn ættingja eða vin í umferðarslysi. Samkvæmt tölum stofnunarinnar létust 12 í umferðinni hér á landi frá áramótum til 10. nóvember.

Sjónum beint að ungu fólki í umferðinni

Í ár er sjónum sérstaklega beint að ungu fólki og hættunni sem fylgir hraðakstri. Samgöngustofa segir unga ökumenn hlutfallslega líklegri til að lenda í slysum en eldri ökumenn. Slysum af völdum ungra ökumanna hefur þó fækkað talsvert á síðustu 20 árum.

Dagskrá minningarstunda um land allt má finna á minningardagur.is.