Freyja Stefanía Jónsdóttir frá Nýlendu er 100 ára í dag. Hún er elsti íbúi Vestmannaeyja. Haldið var upp á aldarafmælið á heimili Freyju á Hraunbúðum í dag. Þar var Freyju m.a. afhent skjal frá forseta Íslands, Guðna Th. Jóhannessyni sem á einmitt afmæli í dag einnig en hann er fæddur í Reykjavík 26. júní árið 1968.

https://eyjar.net/forsetinn-i-eyjaheimsokn/

Freyja fæddist 26. júní 1924 í Dalbæ við Vestmannabraut 9. Foreldrar hennar voru Jón Sveinsson úr Fljótshlíð, sjómaður, verkamaður, f. 14. nóvember 1891, d. 2. maí 1977, og kona hans Jenný Jakobsdóttir húsfreyja, f. 13. mars 1891, d. 12. desember 1970.

Á vefnum Heimaslóð segir að Freyja hafi verið með foreldrum sínum í æsku, í Dalbæ og á Nýlendu við Vestmannabraut 42. Hún varð gagnfræðingur í Gagnfræðaskólanum árið 1941. Freyja vann afgreiðslustörf 1945 og flutti til Vopnafjarðar.

Maður Freyju, (11. október 1947), var Jóhann Björnsson póstfulltrúi, bæjarfulltrúi, forstjóri, f. 14. mars 1921, d. 12. maí 2003. Þau Jóhann giftu sig 1947 á Vopnafirði, eignuðust fimm börn, en fjórða barn þeirra fæddist andvana. Þau bjuggu í fyrstu á Vopnafirði, fluttu til Eyja 1952, bjuggu á Hólagötu 14, en síðast á Nýlendu.

Börn þeirra eru: Björn Jóhannsson lyfjafræðingur, f. 13. febrúar 1949 á Vopnafirði. Jenný Jóhannsdóttir lífeindafræðingur, f. 26. apríl 1950 á Vopnafirði. Inga Jóhannsdóttir verslunarmaður, starfsmaður í þjónustuíbúðum aldraðra, f. 27. desember 1951 á Vopnafirði. Andvana stúlka, f. 12. apríl 1961 í Eyjum. Jón Freyr Jóhannsson tölvunarfræðingur, háskólakennari, f. 17. maí 1962 í Eyjum.

Er Freyju og forsetanum óskað innilega til hamingju með áfangann. Óskar Pétur Friðriksson tók meðfylgjandi myndir í afmælisveislunni hjá Freyju í dag.