Ísfisktogarinn Vestmannaey VE kom til Grindavíkur í fyrrakvöld að lokinni fyrstu veiðiferð eftir sjómannadagshelgi. Það aflaðist vel í veiðiferðinni og var fullfermi landað í gær. Rætt er við Egil Guðna Guðnason skipstjóra á vef Síldarvinnslunnar í dag. Þar er hann fyrst spurður hvernig veðrið hefði verið.

„Til að byrja með var mjög hvasst. Þetta voru 30 metrar og vindurinn fór upp í 40. Við vorum að veiðum nálægt landi og því var ekki mikill sjór þrátt fyrir vindinn. Við vorum að veiðum á Pétursey og Vík og aflinn var ekkert sérstakur til að byrja með en síðan brast á ágætis veiði og við náðum að fylla. Túrinn var ekki langur eða innan við tveir og hálfur sólarhringur höfn í höfn. Aflinn var mest þorskur og ýsa en einnig fékkst dálítið af ufsa. Það verður haldið út á ný fljótlega eftir að löndun lýkur,” sagði Egill Guðni.