Fyrsti snjór ársins lét loksins sjá sig í Vestmannaeyjum í dag eftir óvenju milt veðurfar það sem af er vetri. Þrátt fyrir að hávetur sé genginn í garð hefur veðrið verið með besta móti og snjóleysið því vakið athygli margra.

Óskar Pétur Friðriksson, ljósmyndari Eyjafrétta, fangaði stemninguna í bænum í dag og má sjá myndasyrpu hans hér að neðan þar sem hvít slikja hefur lagst yfir eyjarnar.

Samkvæmt hugleiðingum veðurfræðings á Veðurstofu Íslands hefur kaldara heimskautaloft verið að færast yfir landið síðustu daga og er útlit fyrir að kuldinn nái hámarki á laugardag, þegar frost verður mest norðaustanlands. Eftir það er gert ráð fyrir að heldur dragi úr frosti, þó áfram verði talsvert kalt vel inn í næstu viku.

Á morgun er spáð fremur hægum norðlægum áttum og víða snjókomu norðanlands, en eftir hádegi gæti vindur aukist norðvestantil. Sunnan til á landinu verður að mestu bjart síðdegis.

Um helgina er útlit fyrir allhvasst eða hvasst veður víða vestanlands og eru jafnvel líkur á stormi með suðurströndinni þegar líða fer á helgina. Víða má búast við björtu veðri, en dálítil él eða snjókoma austantil og allra syðst. Þá eru einnig einhverjar líkur á éljum vestanlands, þó að úrkoman verði þar líklega fremur lítil.