Nemendur, starfsfólk og vinir Framhaldsskólans í Vestmannaeyjum gengu á dögunum yfir Fimmvörðuháls við einstaklega góðar aðstæður. Veðrið lék við göngufólkið sem naut náttúrufegurðar á leiðinni frá Skógum í Þórsmörk.

Í frétt á vef FÍV kemur fram að gangan sé orðin fastur liður í skólastarfinu. Hún veiti þátttakendum bæði líkamlega og andlega áskorun og tækifæri til samveru utan skólastofunnar.

Með í för voru einnig einstaklingar sem hafa áður tekið þátt í göngunni og styðja nemendur með hvatningu og góðu fordæmi. Að sögn skólans hafa þeir orðið mikilvægur hluti þeirrar hefðar sem skapast hefur í kringum ferðina.

Gangan var hluti af þátttöku FÍV í #BeActive, Íþróttaviku Evrópu, sem hvetur til aukinnar hreyfingar og heilbrigðs lífsstíls. Skólinn fékk styrk frá verkefninu til að standa að ferðinni. FÍV þakkar nemendum, starfsfólki og sjálfboðaliðum fyrir eftirminnilegan dag og góða samveru.