Ísfélag hf. skilaði góðri afkomu á þriðja ársfjórðungi 2025. Skýrist það einkum af því að annars vegar gengu veiðar og vinnsla á makríl mjög vel og hins vegar aflaði Sólberg ÓF 1, frystitogari félagsins, vel á tímabilinu, að sögn Stefáns Friðrikssonar forstjóra.

Heildarafli skipa Ísfélagsins á þriðja ársfjórðungi var 35.300 tonn, talsvert meiri en í fyrra, og framleiðsla jókst verulega. Á fyrstu níu mánuðum ársins námu rekstrartekjur félagsins 150,4 milljónum Bandaríkjadala og hagnaður 8,3 milljónum dala. Markaðir voru hagstæðir og verð á helstu afurðum hækkaði milli ára.

Einnig hefur verð á helstu afurðum félagsins verið gott og sala afurða gengið vel á árinu. Hjá fyrirtækjum sem stunda uppsjávarvinnslu sveiflast birgðastaðan oft mikið milli vertíða og í lok þriðja ársfjórðungs var talsvert til af birgðum í uppsjávarfiski.

Miklar fjárfestingar á árinu

Félagið hefur fjárfest mikið á yfirstandandi ári. Uppsjávarskip sem keypt var frá Skotlandi, Heimaey VE, leysti af hólmi eldra skip með sama nafni. Mjölverksmiðja félagsins í Eyjum var stækkuð töluvert og ný frystigeymsla á Þórshöfn var tekin í notkun í júlí. Þá er vert að nefna hlutafjáraukningu Austur Holding AS í Kaldvík AS sem Ísfélagið fjármagnaði í júní. Ísfélagið lagði til 341 milljón NOK í téðri hlutafjáraukningu en félagið á 29,3% hlut í Austur Holding AS. Að endingu ber að geta þess að félagið gerði heildarlánasamning við hóp banka í byrjun árs 2025.

Skattahækkanir setja óvissu í reksturinn

Stefán segir að fyrirhugaðar hækkanir á veiðigjaldi og kolefnisgjaldi muni hafa mjög neikvæð áhrif á rekstur félagsins strax á næsta ári. Slíkar breytingar dragi úr fjárfestingaráhuga í sjávarútvegi og hafi þegar sett mark á greinina, þar sem óunninn fiskur sé farinn að fara meira úr landi.

„Þrátt fyrir miklar fjárfestingar á árinu er félagið fjárhagslega stöndugt og fyrir hendi er geta hjá félaginu til að fjárfesta og styrkja rekstur þess til lengri tíma. Miklar hækkanir á sköttum eins og veiðigjaldi og kolefnisgjaldi munu hins vegar hafa mjög neikvæð áhrif á reksturinn strax á næsta ári og öll sú óvissa sem fylgir slíkum skattahækkunum mun óhjákvæmilega hafa áhrif á og draga úr fjárfestingaráhuga sjávarútvegsfélaga að öllu öðru óbreyttu. Tíminn einn mun leiða í ljós hver  áhrif þessara illa ígrunduðu skattahækkana verða. Verri samkeppnisstaða sjávarútvegsins er þegar komin fram í þeirri staðreynd að fiskur er nú fluttur óunninn úr landi í meiri mæli en undanfarin ár.”

Óvissar horfur í kvótamálum

Þá segir Stefán að stórbruni í verksmiðju Primex í Fjallabyggð, dótturfélags Ísfélagsins muni hafa lítil áhrif á fjárhag Ísfélagsins.

„Markaðir hafa verið góðir á tímabilinu, verð á þorski, ýsu og makríl hefur hækkað mikið milli ára og verð á frosnum síldarafurðum hefur haldist gott. Heildarafli skipa félagsins á þriðja fjórðungi ársins var 35.300 tonn samanborið við 23.100 tonn á sama tímabili árið 2024. Framleiddar afurðir voru 23.400 tonn samanborið við 16.400 tonn á sama tímabili í fyrra.

Fyrirsjáanlegt er að veiðiheimildir í makríl og kolmunna munu dragast mikið saman á næsta ári. Tillögur um auknar veiðar í norsk-íslenskri síld vega því miður aðeins að litlu leyti upp á móti niðurskurðinum í fyrrnefndum tegundum. Þá eru líkur á minnkandi þorskkvóta og það eru takmörk fyrir því hversu mikið verð á afurðum getur hækkað.”

Stefán segir að lokum að Hafrannsóknastofnun hafi gefið út upphafskvóta í loðnu fyrir næstu vetrarvertíð.

„Ég bind vonir við að hægt verði að auka kvótann eftir frekari loðnuleit, sem til stendur að fara í fyrir lok janúar. Sú leit mun, eins og undanfarin ár, byggjast á góðu samstarfi Hafrannsóknastofnunarinnar og loðnuútgerðanna að því gefnu að atvinnuvegaráðuneytið veiti stofnuninni það fjármagn sem þarf til þessa brýna verkefnis.”

---

Helstu lykiltölur í krónum (fyrstu 9 mánuðir 2025)

• • Rekstrartekjur: 19,5 ma. kr.

  • Rekstrarhagnaður: 4,9 ma. kr.

  • Hagnaður eftir skatta: 1,1 ma. kr.

  • EBITDA: 6,6 ma. kr.

  • Heildareignir (lok sept.): 105,7 ma. kr.

  • Eigið fé: 67,2 ma. kr.