Landaður afli íslenskra skipa nam rúmlega 32 þúsund tonnum í júní síðastliðnum. Það er 29 prósent minni afli en í sama mánuði í fyrra, samkvæmt tölum Hagstofu Íslands sem birtar voru í síðustu viku.

Samdrátturinn skýrist einkum af minni uppsjávarafla. Engum kolmunna eða makríl var landað í júní í ár, en í júní 2025 nam samanlagður afli þessara tegunda rúmlega 14 þúsund tonnum.

Botnfiskafli jókst hins vegar milli ára og nam tæplega 30 þúsund tonnum í júní. Það er sjö prósent meiri afli en í sama mánuði í fyrra.

Á tólf mánaða tímabilinu frá júlí 2025 til júní 2026 var alls landað rúmlega 1,1 milljón tonna. Það er 13 prósent aukning frá sama tímabili ári áður.

Uppsjávarafli jókst um 30 prósent á tímabilinu og vegur loðnuafli þungt í þeirri aukningu. Á móti dróst botnfiskafli saman um sex prósent og flatfiskafli um níu prósent.