HS Vélaverk ehf. vélaverktakar er í eigu Hafþórs Snorrasonar og Hermanns Sigurgeirssonar. Fyrirtækið fagnaði tíu ára afmæli þann fyrsta október sl.. Umfangið hefur aukist á þessum tíu árum og hefur verið nóg að gera. Starfsmenn eru sjö og  hafa þeir yfir að ráða 21 tæki af öllum stærðum. Þeir hafa komið að nokkrum stærstu verkefnum í Vestmannaeyjum á síðustu árum og nokkur spennandi eru framundan. 

Blaðamaður leit við í höfuðstöðvum fyrirtækisins við Garðaveg þar sem allir voru mættir í kaffi. Allir í vinnugalla, eigendur og starfsmenn. Bera með sér að kalla ekki allt ömmu sína  og Guðjón Borgar fyrrum gröfukarl mættur til að taka þátt í spjallinu. 

Árið 2005 hóf Íslenska gámafélagið starfsemi í Vestmannaeyjum. Sinnti sorphirðu og keypti um leið Gröfuþjónustu Einars og Guðjóns og Gámaþjónustuna og sameinuðust Íslenska gámafélaginu. Hermann fylgdi með Gröfuþjónustunni og Hafþór byrjaði 2006. Þeir bjuggu því að mikilli reynslu þegar þeir ákveða að kaupa gröfudeildina út úr Íslenska gámafélaginu. Félagið ákvað að leggja af gröfuþjónustuna sem Hafþór og Hermann keyptu. 

„Við stofnuðum okkar fyrirtæki, HS Vélaverk þann 1. október 2015 þegar þeir ákváðu að hætta í gröfubransanum. Bjóða okkur að kaupa tækin sem við gerðum vitandi að framundan væru stór verkefni,“ segir Hermann og í kaupunum fylgdu átta tæki. 

Þeir félagar vissu því að hverju þeir gengu þegar þeir hófu rekstur. „Við vorum tveir fyrsta hálfa mánuðinn og unnum langt fram á kvöld alla daga. Sáum að það gekk ekki og fljótlega réðum við einn og eftir mánuð vorum við orðnir fjórir,“ segir Hafþór og reksturinn hefur vaxið og dafnað. „Í dag erum við sjö sem vinnum hérna, með 21 tæki og af því eru fjórir vörubílar. Þetta eru hjólagröfur, beltagröfur, traktorsgrafa og fjórar minni vélar. Vélar af öllum gerðum nema jarðýtur.“ 

Af nægu að taka

Þeir hafa komið að mörgum verkefnum á þessum tíu árum og það stærsta segja þeir vera jarðvinnu fyrir Seiðaeldisstöð Laxeyjar við Friðarhöfn. „Við sáum líka um gröft í kringum allt lagnaverk fyrir Sjóvarmaveituna sem var mikið og flókið verk. Laxey er mikill fengur fyrir allt atvinnulíf í Vestmannaeyjum og við njótum þess. Er Laxey okkar stærsti viðskiptavinur í dag. Við erum líka í gatnagerð á Hvítingaveginum og vinnum mikið fyrir HS Veitur og HS Orku. Sjáum um flest alla jarðvinnu fyrir HS Veitur í Vestmannaeyjum og Mílu,“ segir Hermann. 

Ekki má gleyma einstaklingum en þjónusta við þá er mikilvægur hlekkur í starfseminni. „Það eru húsgrunnar og annað sem tengist byggingaframkvæmdum. Gott dæmi um það eru fjölbýlishúsin tvö við Sólhlíð sem Sigurjón Ingvars er að byggja. Það var mikið verk að grafa grunninn því stutt var niður á fast. Þarna undir er bílakjallari og þeir voru margir rúmmetrarnir af grjóti sem þar komu upp. Það var flutt austur á Nýjahraun og verður nýtt í framtíðinni.  Næst er það grunnur undir aðra þverblokk í Áshamri sem kemur framan við þá gömlu, norðan megin. Þar verður bílakjallari sem er orðin krafa úti á landi,“ segir Hafþór. 

Af þessari upptalningu má sjá að næg eru verkefnin, svo eru stór og skemmtileg verk í bígerð,“ segir Hermann. 

Þeir segja ekki mikið um útboð í jarðvinnu í Vestmannaeyjum. „Það er helst hjá Vestmannaeyjabæ sem verður að bjóða út verk lögum samkvæmt. Líka hafa HS Veitur boðið út stærri verkefni,“ segir Hafþór. 

  Hafa áunnið sér traust í gegnum árin 

HS Vélaverk hefur áunnið sér traust í gegnum árin og þeir hafa  í þrjú ár verið ofarlega á lista Credit Info yfir framúrskarandi fyrirtæki. „Við skoruðum mjög hátt og erum stoltir af viðurkenningunni og viðurkenningin er mjög mikilvæg fyrir okkur. Hún hefur ekki mikið að segja í Vestmanneyjum þar sem allir þekkja okkur og vita fyrir hvað við stöndum. Þetta gæti komið okkur til góða ef við þyrftum að leita að verkefnum uppi á landi. Sem betur fer er það ekki í augsýn. 

Árið 2024 stofnuðum þeir ásamt DVG steypustöðina Steypey og eru búnir að vinna mikið af efni fyrir þá. Hjá Steypey eru tveir starfsmenn. Svo erum þeir að stofna Efnisvinnslu Vestmannaeyja ásamt þremur öðrum fyrirtækjum til að framleiða og selja jarðefni.