Húsfyllir á tónleikum bræðranna Það er óhætt að segja að það hafi verið fjör í Höllinni í gærkvöldi þegar fram fóru tónleikar með bræðrunum Ingólfi og Guðmundi Þórarinssonum. Með þeim var heil hljómsveit af fagmönnum, en ber þar helst að nefna Bjössa sax, sem margir þekkja.
Ingó og Gummi tóku öll sín bestu lög við góðar undirtektir. Slagarar eins og Suðurlandsins eina von, Valli Reynis, Bahama og Bálskotinn í þér féllu vel í kramið á meðal áhorfenda, sem voru á öllum aldri. Frumflutt var lagið “Bikaróði Eyjamaðurinn” sem fjallar um Grétar Þór Eyþórsson. Ingó sagði frá því að margir hafi haldið að hann hafi sjálfur fengið þá hugdettu að gera lag um Grétar, en staðreyndin væri sú að Grétar væri búinn að vera að suða um lag síðan árið 2014. Það hafi síðan verið á golfvellinum í Eyjum síðasta sumar að lagið og laglínan hafi komið til hans. Grétar tók síðan lagið með bandinu í lokin við mikinn fögnuð viðstaddra.
